Vawiin hi India ram in zalenna a hmuh champha Independence Day vawi 73-na a ni a; Lunglei District-ah ropui taka lawm niin a lawmna pui ber chu Thuamluaia Mual Lunglei-ah Pu C.Lalrinsanga Hon’ble Minister Agriculture, Irrigation & Water Resources, Cooperation Departments hovin urhsun taka hman a ni. Khuallian Pu C. Lalrinsanga chuan Hnam Puanzar pawtparhin, Parade Contingent 21-te Hnam Puanzar chibai bukna a chhang let a; Independence Day thuchah a sawi hnuah Parade intihsiakna a tithate leh Independence Day puala Sports Association-te intihsiakna hrang hranga tithate hnenah lawmpuina a hlan bawk.

Pu C. Lalrinsanga chuan India ram zalenna kha kum tam tak sual niin mi tam takin an nunna hlu tak an hlan a, an that lai hunte hlanin tanin ah an vanglai hun te an hmang ral a ni tiin zalenna kan neih theihna tura he ram ropui tak din tute beisei leh hmathlir hlen chhuak turin inhlan thar ang u, a ti a. India rama state dangte an than rualin kan economy pawhin hma a sâwn ve zel a, kum 2019-20 chhûnga kan GSDP chu cheng vaibelchhe 25,869.14 ni tura chhût niin, kum 2018-19 atanga a thanna hi zâa 16.15 a ni, a ti.

Khuallian chuan Sawrkar hmalakna hrang hrang tarlangin Mizoram Sawrkar Flagship Programme “Socio Economic Development Policy (SEDP)’ chuan Gross State Domestic Product (GSDP) sang zawk a thlen dawn a, mipuite sum dehchhuah tihpun a tum bakah eizawnna kawng a hawn belhin hmasawnna ngelnghet leh tluantling a thlen dawn a ni. Hei bakah hian hmasawnna ruhrel din hi a tum pawimawh ber pakhat a ni bawk a.SEDP kalpui nan hian Development Board 14 lai din niin Heng Board hrang hrangte hian chanpual insemin chak takin hma an la dawn a ni. SEDP kaltlangin Mau hmang hian nasa takin kan economy chawi kan kan tum a ni tiin Chief Minister zahawm tak hmalakna hnuaiah mau chi Brandisii leh Latifloras- te chin thuai tum anih thu a tarlang a. Mizorama District thar pathum- Hnahthial, Khawzawl leh Saitual huamchhunga mipuite a lawmpui takzet thu a sawi bawk.

Mizoram mipuite himna chu Sawrkar ngaih pawimawh ber a ni tiin hemi kawnga Dan kengkawhtute, tlawmngai pawl, kohhran leh mipui vantlang te inpekna leh thawhrimna chu fakawm a tih thu Minister chuan a sawi a. Lunglei khawpui a lo him zawk theihna turin Lunglei Town Surveillance Project pawh kalpui mek niin 1st Phase-ah CCTV Camera 38 hmun lun laiah vuah a ni tawh a. He CCTV Project hi Lunglei khawpui tan thil thar niin khawvel hmun changkang zawkah te an lo hman tawh thin angin Traffic Control System atan te, rikrum thil ah te, rukruk thil ah te a tangkai hle dawn a ni, a ti. Tin, India ram hmun dang ang bawkin Ministry of Home Affairs bultumin Student Police Cadet Programme te siam a ni a. Higher Secondary School Naupang ten hei hi hmang tangkaiin thalaiten thil tha tih duhna te, sual do tura rilru lama inpuahchahna tha leh midangte tana malsawmna nihna kawng duhawm tak an zawh chhoh mek thu a sawi bawk.

Ruihhlo hi kan thalaite nun tichhetu, ram leh khawtlang hmelma a nih avangin nasa taka vil reng a ni a, tun kum kal mek chhung hian Excise & Narcotics Department Lunglei chuan, ruihhlo leh ruihhlo siamna hmanrua engemawzat manin ND&PS Act leh MLPC Act hnuaiah mi 128 lai thubuai an siam sak tawh tih khuallian chuan a tarlang bawk a ni.

Kuthnathawktute hmasawnna tura sawrkar hmalakna pawimawhte sawiin loneitute tan “Doubling farmers income” tih chu thupuia neiin kawng hrang hrangin Sawrkarin hma a la mek a ni, a ti. Hun reilote chhungin Sub Mission on Agriculture Mechanisation (SMAM) hnuaia Custom Hiring Centre atangin loneitute tan Tractor 200 leh power tiller 1500 ngawt semchhuah a ni tawh a. Tin, loneitute hman tangkai theih turin State Agriculture portal (loneitu.nic.in) pawh access mai theihin kan nei tawh bawk a ni, a ti. UNO project lian pakhat Global Environmental Facility, ‘GEF-6’ ti a koh chu Thorang leh Dampa sanctuary behchhanin Mizoramah kalpui tur niin he project manage nan hian Lunglei chu thlan fel a nih tawh thu Minister chuan kalkhawmte hmaah a puang bawk a ni.

Irrigation and Water Resources Department hmalaknate pawh sawiin state sawrkar chuan PMKSY (Har khet ko Pani) hnuaiah Minor Irrigation Scheme kal mek 36 a nei a. Kum 2019-20 chhung hian heng project te hi Cheng Nuai 4246.92 hmangin command area hactare 1723 cover turah kan in ngai a, loneitu 1055 laiin a zar an zo thei dawn a ni, a ti. February ni 27, 2019 khan National Water Policy 2012 dungzuiin kan state-in kan mamawh em em mai Mizoram State Water Policy 2019 launch a nih thu a tarlang bawk.

Mipui vantlang hriselna sawrkarin a ngaih pawimawh thu sawiin Minister chuan NITI Aayog in hriselna lama hmasawnna tehna kumin June thla a a tihchhuahah Mizoram chu India rama state tenau te zingah pakhatna niin India ram pum huapin pahnihna a ni a, hriselna kawngah hma kan sawn zel theih nan kawng hrang hrangin ruahmanna kalpui mek a ni, a ti. Health & Family Welfare Department hnuaia post ruak tam tak hnawh khah tulin a hria a, a bîk takin Doctor leh Nurse post ruak eng emaw zât hnawh khah a nih ngei theih nan kumin Budget ah cheng nuai 5,000 dah hran a ni. Mizoram Health-Care Scheme zawmtute medical reimbursement chinfel zung zung a nih theih nan he sorkar hian cheng nuai 2,000 chu assistance to healthcare atan dah hran a tum bawk a ni, a ti.

Ram mamawh em em electric power, inkalpawhna (transport) leh inbiakpawhna (communication) te ti hmasawn zel turin sawrkarin theihtawp a chhuah mek thu sawiin inkalpawhna kawngpui tha kan neih theih nan District hmun hrang hrangah hmalak a nih thu a sawi a. Tunah hian Sawrkar laipui Pradhan Mantri Gram Sadak Yojana (PMGSY) sum hmangin kawngpui 5 (panga), km 115.76-a thui Cheng Nuai 8868.134 man chu Km 48.825 thleng laih zawh tawh a ni. PWD hnuaia Road Fund Board tân kan ram chhung kawng chhe lutuk thawm thatna turin kumin Budget-ah cheng nuai 5,000 dah hran a nih thu a sawi bawk. Melriat to Khawiva 110 km Single Circuit Transmission Line chu Rs. 4176.06 lakhs sengin December 2019 ah hian zawh fel beisei niin Integrated Power Development Scheme hnuaiaah Power Distribution network tihchangtlun hna thawh me ka ni bawk.

Urban Development and Poverty Alleviation Department chuan khawpuia cheng mi harsa zawkte khaichhuahna programme engemawzat a kalpui mek a. Pradhan Mantri Awas Yojana (PMAY) - Housing for All hnuai ah hian insak tanpuina diltu mirethei chhungkua (eligible) 2666 atangin 1st phase ah chhungkaw 792 te hnen ah tanpuina Rs 1,50,000 (Nuai khat singnga) theuh pek niin Housing Loan pawh kum tin atan chhungkaw 200 zel hnen ah Loan pek mek an ni.

Tar chaklo zawkte leh naupangte enkawlna leh venhimna kawng hrang hrang pawh chak taka thawh reng a ni a. Kan naupangte enkawl nan kan District ah Anganwadi Centre 418 awmin Integrated Child Development Services (ICDS) project pali – Lunglei, Hnahthial, Bunghmun leh Lungsen te hi CDPO te enkawlna hnuaia awm an ni. Naupang hriselna dinhmun te uluk taka en sak reng an nih bakah sawrkar in vaccine lak tur a tih apiangte an lak ngei theih nan enkawl an ni bawk. District Programme Officer (ICDS) hian Sub-Godown a enkawl a, Mizoram chhimlam District pathum te nutrition pekchhuahna hmun a ni.

Ei tur tha leh hrisel- arsa, sangha leh sa dangah te intodelh turin department hrang hrang kaltlangin sawrkar chuan hma nasa takin a la a. Kumin chhungin ran damlo 35,970 (sing thum sang nga leh zakua sawm sarih) enkawl an ni a, hri danna a tul anga pek an ni. Milk Union Limited, Lunglei-in bawnghnute thianghlim mipuite hnenah litre 1,99,879 lai a hralh chhuak a, District poultry farm Lunglei atangin artui 55,953 leh Ar Note 4625 hralh chhuah a ni. Rs. 80,00,000/- (Cheng nuai 80) senga sak tura ruahman State Vety Hospital Lunglei chu sak tan mek niin Lungpuizawl-ah Poultry Farm cum Hatchery Rs. 300,00,000/- (Cheng nuai zathum) senga sak tura ruahman chu hnathawh chhoh mek zel a ni, a ti.

Ni za inhlawhna pawh tluang takin kalpui zel a ni a; Lunglei ditrict hian Job Card holder 37162 kan nei a, kum 2018 – 2019 chhung hian Central leh State atangin MGNREGS Fund 9108.32 lakhs dawn a ni a, mipuite hnenah inhlawhna ni 100 pek a ni. MGNREGS hnuai ah hian heng hna – Rural Connectivity, Individual Household latrine, Roadside Plantation, playground, Fish pond/Farm hna te hi thawh a ni. Pradhan Mantri awaas Yojana Gramin (PMAY-G) hnuaiah Kum 2018-19 chhung khan chhungkua 451 hnenah Rs 1,30,000/- theuhin insak sak na ni a, tunah chhungkua 469 sak sak tur a ruahman a ni tih a tarlang bawk.

Kum 2018-19 chhung khan National Food Security Act, 2003 hnuaiah Lunglei District mipui 109425 (AAY leh PHH beneficiary) te hnanah buhfai man tlawm Kg ah Rs 3/- in Quintal 77522.54 semchhuah a ni a. Tin, beneficiary ni pha ve lo mi 86548 hnenah buhfai man tlawm tho, Kg ah Rs 15/-in sem chhuah a ni bawk. Tin, Central sawrkar nena ruahmanna siam tlanna hnuaiah Midday meal pawh a thlawna sem chhunzawm a ni.

Heng hmasawnna duhawm tak tak kan neih theihna bul chu zalenna, khua leh tui ten an thlan ngei rorelna ram kan neih vang a ni tiin zalenna hlutzia hre thar leh a, zalenna meichher chhawm nung zel tura beia, kan ramin hmasawnna hna a thawh tinrengte tha taka thawhpuitu nih tum theuh turin Minister chuan kalkhawmte a sawm a.

Vawiin Independence Day parade-a contingent 21 zingah hian Armed Contingent pahnih, Unarmed Contingent paruk, School Contingent sawmpakhat leh Band Parties pahnih te an tel a,  SI B. Lalnunsanga chu Parade Commander niin SI C. Lalhnehzova chu 2nd Parade Commander a ni. Unarmed contingent zingah NCC Air Wing BHSS Junior Section chu pakhatna niin NCC Air Wing BHSS Senior Section chu pahnihna an ni a Scout & Guides, Southern Flowert School te chu Pathumna an ni. School Contingent zingah Serkawn Sikulpui Pakhatna niin Sacred Hearth School Lunglei chu pahnihna an ni a, 2ng Bn. MAP English School Lungmualte chu pathumna an ni bawk.

Kumin Independence Day pual hian Badminton, Table Tennis, Lawn Tennis, Chess, leh Corrom Board bakah Football-ah te inelna buaitsaih a ni a. Heng intihsiakna a tithate hnenah khuallian chuan lawmpuina a hlan bawk a ni.

Thuamluaia Mual-a Independence Day lawmna inkhawm neih a nih zawh hian khuallian Pu C.Lalrinsanga hovin mi sawm bikte tan Lunglei Government College Multipurpose Hall-ah DC’s At Home function hman zui a ni bawk.