India Independence Day Vawi 73- na hmanpui turin Pu Lalruatkima, Minister, Rural Development, Land  Revenue & Settlement Department leh Information & Public Relations chuan vawiin khan Mamit thlengin District Bawrhsap, Officials te leh Khawtlang hruaitute'n Tourist Lodge Mamit-ah an lo dawngsawng.

Minister hian a Department chan Rural Development(DRDA) Mamit Office tlawhin thawktute nen inkawmna neih a ni a. Department hmalakna leh hmachhawp mekte sawihona neih a ni. Land Revenue & Settlement Department Mamit a tlawh bawk.

Pu Lalruatkima, I&PR Minister hian Mamit District Information & Public Relations Department tlawh bawkin Pu Paul Rokima, DIPRO chuan a lo dawngsawnga,  District Office mamawh hrang hrang a lo thlen zingah hian Information Department chu Sorkar pawimawh leh tul a pianga duty ngai an nih avangin Motor duh anga neih that tawkloh a ni chuan harsatna a thlen thin thute, Officers Quarter neih a nih theihnana hmalakpui leh thawktu indaih lohna nasa tak avanga harsatna an neihte chu a lo thlen a ni.

Minister hian I&PR Department Mamit-in harsatna an thlente chu ngaihthlaksakin a theih ang anga chinfel pui an nih theihna turin hmalak pui tum a nih thu a sawi.