Mizorama lo zin India President 14-na Pu Ram Nath Kovind chuan vawiin khan Mizoram Legislative Assembly House-ah Assembly Speaker Pu Hiphei kaihhruaina hnuaiah Mizoram Legislative Assembly Member-te nen ‘Special Session’ an nei ho. He hunah hian Mizoram Governor Lt.Gen.Nirbhay Sharma, PVSM, UYSM, AVSM, VSM (Rtd) pawh telin, India President hian House Leader Chief Minister Pu Lal Thanhawla leh House Member kalkhawmte hnenah thuchah a sawi.
India President Pu Ram Nath Kovind chuan Mizoram a rawn zin vawi khatnaah Speaker, Deputy Speaker, Chief Minister leh MLA-te duhsakna dawngin Assembly House-ah an hnenah thuchah sawina hun a nei thei chu a lawm thu a sawi a. Mizoram Assembly inrelbawldan leh Member-te House chhungah an chet puitlinzia chu hriathlawh tak a ni a, ramchhung hmun dangah House chhunga inhnialna emaw sawihona chuan boruak duhawm lo takte a thlen thin laiin Mizoram Assembly House-ah chuan chutiang chu kum 45 chhungin vawi khat mah a la thleng ngai lo chu hmun dangte tan entawntlak a tling a ni, a ti. Mizo khawtlang nunziaah pawh mahni zahawmna invawng tak an nih tih a hriat a, chu chu Mizoram Assmebly House leh state chhung politics-ah pawh a lang thei a ni, a ti bawk. Kum 20 chhung rambuai hnuin kum 1986 khan Mizo Peace Accord ziah a ni a, he remna thuthlung hi a hlawhtlinna chhan chu Mizo mipuite bakAh kohhran leh tlawmngai pawl zawng zawngte thawhhona a ni a, chu bakah ramhruaitu hmathlir thui tak nei thiam Pu Laldenga te, Brig.T.Sailo leh tuna Chief Minister ni mek Pu Lal Thanhawla te inpekna vang a ni bawk a, anni hian Mizoram chauh an siamtha lova India ram ropui zelna turah nasa takin an thawhhlawk a ni, a ti. India ram thang zelah a chhunga cheng mipui, hnam ziarang leh nunphung inang lo tak tak te chu mahni state chhuahsana state dangahte eizawnna avangin an chhuak a, chung zingah chuan Mizo engmawzatte pawh an tel a; hetiang ramchhung mite inpawh tak leh innghirnghona awm lova kan cheng za thei hi India ram ropuina leh bik a nihna a ni a, kan chhawm nun reng a ngai a ni tiin Pu Kovind chuan a sawi. Mizoram chu tlangram chhengchhe tak leh inkalpawhna harsatna hmun a ni tia sawi ni thin mahse a ram awmna hmun hi a lailiin a pawimawh em avangin India sorkar pawhin Act East Policy-ah a dah sang a, hmarchhak bial bakah India ramchhung state dangte leh South East Asia ramte an inthlunzawmna ber tur chu Mizoram hi a ni dawn a ni, a ti. Hei hian Mizoram atanga thlai leh thildang dehchhuahte tan market a siam zau ang a, IT leh Internet connectivity pawh a tichangtlung ngei dawn a ni, a ti a. Hun rawn kal zel atan sorkar lam chuan theihtawp chhuahin helai bial atana hmasawnnna ruangam mamawhte chu a phuhruk zel dawn a, a tak taka thawktu leh Mizoram hmasawnna tura thawk turte chu a state mipui leh a bik takin thlalaite an ni dawn a ni tiin India President chuan Mizote ziak leh chhiar thiamna lamah an san chuan nasa takin a pui dawn a ni, a ti a. Mizorama a lo zina amah lo hmuaktu kawngpui sira ding mipuite nui hmel chu a thinlungah a cham reng tur thu sawiin Mizoramah lo zin leh ngei a tum tur thu a sawi bawk.
Mizoram Governor Lt.Gen.Nirbhay Sharma pawhin thu sawiin Pu Ram Nath Kovind chuan Mizoram a rawn tlawh hmasakna berah Mizoram Legislative Assembly Member-te nen hun tha tak an hmang thei chu a lawmawm takzet a, a ti. Mizoram Peace Accord hlawhtlinna ber chu Mizo mipuite an ni a, Mizo mipui leh khawtlang inpawh tak, lungrual leh thawhhona tha tak chu ramchhung hmun dangte tan entawntlak a ni takzet a ni, a ti bawk. India sorkarin Act East Policy a kalpuinaah Mizoram chuan hmun pawimawh tak a luah mek a, amaherawhchu infrastructure lamah a la pachhiat em avangin sorkar chuan inkalpawhna leh inbiakpawhna tha leh ramchhung leh pawn nena inzawmna (connectivity) tha a neih theih nan ruahmanna changtlung tak a siam sak a ngai a ni, a ti. Tunhnaia Mizoram leh Myanmar ramri bawr vela boruak thleng vang ringawt pawhin ramri venhimna hna chu uluk zawka kalpui a pawimawh thu Larsap chuan a tarlang bawk a; President lo zin hian Mizoram mamawh tam tak thlenna hun remchang a siam chu lawmawm a tih thu leh ram hmasawnna atan thawhhona tha zawk a siam ngei a beisei thu a sawi a ni.
Vawiina India President hova Mizoram Legislative Assembly Special Session chu House Leader leh Chief Minister ni bawk Pu Lal Thanhawla’n lawmthu sawina hun hmangin a khar a. Special Session zawh hian Seventh Mizoram Legislative Assembly Member-te bakah Mizoram Governor Lt Gen Nirbhay Sharma nen India President thla an lakpui a, Assembly Annexe Recess Room ‘A’ ah inkawmhona an nei zui a ni.
