India ram indan kum 70 a tlin lawm nan School Education Department buatsaihin August 19,2016 Zirtawpni zing dar 6-ah Aizawl khawpui chhungah Freedom run neih a ni dawn. He Freedom run neih tur chungchangah hian vawiin (Dt 10.8.2016) chawhnu dar 2 khan School Education Conference Hall-ah Officers meeting neih a ni.

School Education Department Officers Meeting Pu K.Lalrintluanga Addl Director kaihhruaiah hian Freedom run neih dan tur ruahman a ni a. Aizawl khawpui chhung hmun hnih Chanmari kawn leh Sikulpuikawn atangin A.R lammual pana tlan tur a ni a. Zing dar 6 ah Chanmari atanga chhuak turte chu Pu H.Rohluna School Education Minister-in a vailiam ang a, Sikulpuikawn atanga chhuak turte chu Pu Joseph Lalhimpui Pariamentary Secretary-in a vailiam thung dawn a ni. Hmun hnih atanga chhuakte hi AR lammualah tlan lutin a kharna atan National Anthem sak a ni ang. Freedom run hi India ram hmun hrang hrangah August 15-23,2016 chhunga neih tur a ni a. He hun khar nan Aug 23,2016 Tuesday chawhma dar 11 ah India ram zirna in zawng zawngah a rualin National Anthem sak a ni dawn bawk.

Meeting-ah hian Chanmari leh Sikulpuikawn atanga tlan tur school te ruat an ni a. Chanmari kawn atangin School 6- Govt Mizo High & Higher Secondary School, Chaltlang High & Higher Secondary School, Republic High & Higher Secondary School, KM High & Higher Secondary School, Helen Lowry High & Higher Secondary School, Modern High & Higher Secondary School zirlaite an tlan ang.

Sikulpuikawn atangin Mamawii High & Higher Secondary School, J.L High & Higher Secondary School, Central High & Higher Secondary School, Synod High & Higher Secondary School, St Paul’s High & Higher Secondary School, Mice High & Higher Secondary School zirlai te an tlan dawn a ni. Zirlaite hian anmahni school T-shirt theuh an ha dawn ani.