August ni 10 khan BRC Hall Darlawnah Govt. Deputy Chief Whip Pu R.L.Pianmawia chuan Commerce & Industries Department kaltlangin NLUP 3rd phase, second installment a sem.

Pu RL Pianmawia chuan sawrkar in a ngaih pawimawh em em NLUP beneficiaries te hnenah sum sem chhunzawm a ni chu lawmawm tiin mi rethei te hnenah rulh leh ngai tura a puka puk tir lova, sem a ni chu khawsak harsa zawkte tana dinchhuahna remchang siamsaktu a nih a beisei thu a sawi. New Economic Development Policy (NEDP) kalpui tan a nih tur thu sawiin Govt. Deputy Chief Whip chuan NEDP hmang hian link road siam bakah mipui mamawh phuhrukna tur thil tam tak a huam, a ti a. Remna leh muanna zawnga inbiakna kal mek a hlawhtlin theih nan bial chhung mipuite tawngtai turin a sawm bawk a ni.

NLUP sum sem zawng zawng hi cheng nuai 35,99,000 a ni a. Mi 83 hnenah pek niin Darlawn, Pehlawn, E.Phaileng, Kepran, Lungsum, Zohmun, Sakawrdai, Vaitin, N.Serzawl, Thingsat leh Sawleng te chu Bank remchang a awm loh avangin a pawisa a pek an ni a. Ratu erawh chu kalphung pangngaiin bank kaltlanga pek an ni.

Pu R.L Pianmawia hian Darlawna BDO Office ah rangva a sem bawk a. Mi pakhat tan bundle 4 zelin mi 30 hnenah pek a ni. Bundle 4 hi cheng 15,312 man hu a ni a. A thlawn tawp aiah mi pakhatin cheng 1531 an pe a ni. Rangva hi Rural Housing Scheme (RHS) kaltlanga sem a ni.