Vawiin khan Champhai District chhunga Kelkang khaw mipui te chawmtu tur, Ni zung chakna hmanga India ram chhunga Tui Pump chhuah sang ber tur chu enchhin a ni a, he hun hi Pu C.Lalremsiama, Chief Engineer, Zone-II PHED kaihhruaina hnuaiah hlawhtling taka neih a ni.
Kelkang khua chawmtu tur Ni zung chakna hmanga tuilak hi Cheng Nuai 631 senga thawh niin, kumin, 2016 February ni 3 atang khan thawh tan a ni a, December 2017, kum hnih chhunga thawh zawh tura ruahman chu tunah hian hna thawh zawhfel niin, tui pump theiha peihfel a ni ta a. Vawiin khan Chief Engineer Pu C.Lalremsiama chuan khawl tinungin tui hi Kelkang khaw chungah hlawhtling taka pump chhuah chhoh a ni a. Tui pump chhohna pipe leh Tank siam zawh tawhte bakah siamfel tul awmte peihfel a nih veleh hawn theih tawh mai tura peihfel a ni ta a. Tun dinhmunah hian he tuilakna hi peihfel niin, Kelkang mipui te tan hnianghnar taka tui pek theih a ni dawn ta a ni.
Kelkang leh Dilkawn ramri, Banglalui tuilakna atan hian 80mm GI Pipe hman niin, submersible pump khawl 7.5KW, 380-415 Volt, 17-17 Ampere, Lorenz, Germany siam khawl chu hman a ni a. He tuilakna atan hian Treatment Plant atangin Tuidahkhawna Tank lian litres 70,000 dawng te, Litres 30,000 theuh dawng 3 bakah, Kelkang khaw lu-ah tui pump dahkhawlna litres 1,00,000 dawng Reservior siam a ni bawk a. He tui pump-na hmun leh control room panna kawng hi 4.50 Kms laia thui chu tha tak laih a ni bawk a.
Ni zung chakna hmanga metres 520 zeta sanga tui pump hna thawh mek hi M/S P&V Eastern Engineers, Bawngbawn, Aizawl ten an thawk a. Tui pump-na atan hian Tank 4 dahna hmun apiangah hian tui pump-na khawl 2 zel, standby tur nen chhawp nghal vek a ni bawk a. Tui lakna atan hian Ni zung chakna lakna tur, Solar Power Plant 62.22KW bun niin, Solar Module 204 dah a ni a. Nikhat chhunga tui lirtres 82,000 pump thei tura ruahman a ni a, Ni zung chak zawng tehna Irradiance 150W/m2 a chak atangin a pump tan thei dawn a, hei hi 1000W/m2 niin, a chak lai ber hian 1300 w/m2 tura ngaih a ni a. Tui a pump chak lai ber hian Second khatah lirtres 4 pump chhuak thei tur a ni a, vawiin chhum awm tam lai deuha pump chhin a nih lai pawh hian second khatah litres 3 chuang a pump thei a.
He tui lakna siam zawh thar takah hian tui lak tur hi a tam tha hle a, Kelkang khaw mipui awm zat 1234-te tan nitin tui litre 55 (55 LPED) zel pe tur ang a chhut pawhin nikhatah darkar 7 vel chhung pawhin hnianghnar taka mipui tan tui sem tur pump theih tura ngaih a ni a. Tunlai Mizorama PHED in mipui hnena tui a semchhuah hi a tlangpuiin 40 LPED vel semchhuah thin ang a ngaih a ni.
