Rio Olympics 2016-a India Women Hockey Team Player, Mizo nula H.Lalruatfeli chu vawiin khan Sports Minister hovin CYMA Auditorium-ah hmuahna hun hman a ni a. He hunah hian Sports Parliamentary Secretary Pu Hmingdailova Khiangte, Sports Secretary Pu H.Rochungnunga, Mizoram Sports State Council, Mizoram State Olympic Association leh Mizoram Sports Association zawng zawng aiawhte kim takin an tel.

Olympian H.Lalruatfeli hmuahna leh chawimawina inkhawm MSOA Secretary Pu C. Laltlanthanga kaihhruaiah Sports Minister leh MSOA Sr. Vice-President ni bawk Pu Zodintluanga chuan sorkar chuan hmathlir thui tak neiin Mizo thalaiten infiamna khawvelah phochhuah a tum zel a, kumin Olympics-ah pawh ram aiawha chhuak tur zingah Mizo hmel tel ngei turin nasa takin tanlak a ni a, chu chu H.Lalruatfeli hian a tihlawhtling ta a ni, a ti. Mizo hmeichhiate zinga Olympian hmasa ber H. Lalruatfeli tawrhchhelzia leh a tumruhnate chu infiammi dang zawng zawngte tan entawntlak a nih thu sawiin Minister chuan Sports Association tin ten an player-te fuihna hmang turin a chah. Mizoram State Sports Council hotute chu Mizoram dung leh vangah zin kualin Mizo thalai talent nei tha an zawn rengna zarah vawiinah hian Mizo infiammi national leh international level-ah thehchhuah tlak engemawzat chherchhuah an ni tawh a ti bawk. Olympics 2020-ah Mizo infiammi a tam thei ang ber ram aiawha chhuak thei turin tun atangin tanlak a ngai takzet thih thu sawiin Pu Zodintluanga chuan India ram mihring maktaduai tam tak zingah Indian Hockey Team player 18 chauh an lak zingah H.Lalruatfeli a tel thei hi a chhuanawm takzet a, a kal ve theihna tura theihtawp chhuahtu Mizoram Women Hockey Assn leh MSSC chungah lawmthu a sawi bawk.

Parliamentary Secretary Pu Hmingdailova Khiangte pawhin thusawiin engemaw hun atang khan Mizoramah hockey a chuai hle a, amaherawhchu Sports hotute hmalakna, a bik takin Sports Director hlui Pu Zoliana Royte hmalakna avangin vawiinah chuan hockey player tha tak tak Mizo zingah an awm leh ta a. Sports Department hnuaia hockey player train chhuahte phei chu sipai leh hmun dangah hna an hmu zel a, hei hi Mizo infiammite tan lawmawm tak a ni, a ti.

Olympian H.Lalruatfeli pawhin a hlawhtlin nana a chhungte bakah sorkar leh Sports lam hotute duhsakna leh tanpuina chungah lawmthu a sawi a, hlawhtling tur chuan hrehawm tam tak paltlang a ngai a ni tia amah fuih thintu a coach te chungah lawmthu a sawi bawk.

Sports Minister Pu Zodintluanga chuan Olympian H.Lalruatfeli hi Mizoram State Spoirts Council atangin cheng nuai 3 leh Mizoram State Olympic Association atangin cheng nuai 2 a hlan nghal a. Sports Association hrang hrangin lawmpuina an pek bakah Mizo Olympian hmasa ber Pu C.Lalremsanga (Archery) chuan Olympics Badge a hlan bawk a ni.