1078/2026-2027

19th June, 2026: India rama sawrkar damdawi in ṭha bik tehna, National Quality Assurance Standards (NQAS)-ah Lengpui CHC leh Health & Wellness Centre (Sub-Centre) pahnih – Upper Republic HWC-SC leh Electric Veng HWC-SC te an tling thar a, heti hian Mizoram chhunga Cummunity Health Centre (CHC) pakua awm zinga pathumin National-level NQAS certificate nei tawhin HWC-Sub Centres pathum (3)-in National Certification puitling an nei tawh bawk.

Dr. R Lalchhuanawma, Mission Director, National Health Mission, Health & Family Welfare Department chuan NQAS national-level endiknaa tling thar Lengpui CHC hian a tehnaah 97.59% an hmu a, Upper Republic HWC-SC hian 81.08% hmuin, Electric Veng HWC-SC hian 84.10% an hmu bawk a ni.

Heti hian Mizoram chhunga Sawrkar damdawi in 119 te’n NQAS national-level certificate an nei mek a. Tunah hian sawrkar damdawi in 47-in (HWC Sub-Centre 40 telin) state-level NQAS certificate an nei tawh a, national-level-a endikna tur an dil mek a ni.

NQAS certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn aṭangin Assessor (endiktu) an lo kal ṭhin a ni. Hetah hian a tehnaa 70% an hmuh tlin chuan certified an ni chauh ṭhin. Heng certified tawh damdawi inah te hian natna darh thei ven kawngah te, thawktu zawng zawngte’n an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te, khawtlang nena an thawhhonaah te endik an ni.

Mission Director, Dr. R Lalchhuanawma chuan India rama damdawi in ṭha tehna a tling thei tura thawktu State Quality Assurance Unit te, District Quality Assurance Unit, Aizawl East leh Aizawl West-a Sr.CMO leh Staff zawng zawng te, Dr. Judy Saipari Sailo, Medical Officer, Lengpui CHC leh a thawhpui Nurse leh staff zawng zawng te, Pi C Lalrinzuali, Health & Wellness Officer, Upper Republic HWC-SC te, Pi C Lalnunmawii, Health & Wellness Officer, Electric Veng HWC-SC te leh an thawhpui Health Worker leh staff zawng zawng te, khawtlanga an thawhpui RKS leh JAS Chairman leh member zawng zawng te chu fakawm a tiin lawmthu a sawi a.  Heng NQAS certified sawrkar damdawi in kan neih tak te hi mipuite’n ṭangkai taka an hman a duhsak a, mipuite pawhin ṭangkai taka hmang turin a chah bawk.