Mizoram thalaite chanvo tur post 200 vel lai sipai (Army) lak runpui October, 2018 thla chawhma lama lo awm tur leh, kum 3 chuang zet zawt Staff Selection Commission (SSC)-in a lo buatsaih tawh loh Scheduled Tribe tana post 4913 Central Armed Police Forces (Constable) Examination, 2018 atan Mizoram thalaite tan Mizoram Youth Commission chuan Pre-Recruitment Training a buatsaih dawn.

Mizoram Youth Commission chuan kum 2018 hi Mizoram thalaite tan ‘Sipai luh runpui kum’ atan kan lo puan tawh avangin, tuna Army leh Central Armed Police Forces-ah hian a tam thei ang ber Mizoram thalate an tlin theih nan Mizoram Youth Commission chuan Mizoram District khawpui tinah a duh apiang tan Written Exam leh Physical Fitness atan Pre-Recruitment Training mumal leh tha tak kan buatsaih dawn a, August 2018 thla tirah tan nghal turin ruahmanna kalpui mek a ni. Pu Joseph Lalhimpuia, Chairman, MYC chuan “he hmalakna hi chhungkaw tam tak leh Zoram Economy tana tangkai tham kan thalaite he Army leh Central Police laknaah tling thei se kan tih avangin theihtawp chhuahin hma kan la chho dawn a. District khawpui tina MYC-in Pre-Recruitment Training kan buatsaih tur hi rawn zawm turin Mizoram thalaite ka chah a ni” a ti.

Vawiin a press mite nen inkawmho na ah hian Indian Air Force GARUD Commando a tunhnaia tling Richard Lalhmingthanga, Tlabung khua chuan test hrang hrang a paltlang chhoh dan te report a pe a, tunah hian calling letter a nghah mek thu te chanchinbu mite a hrilh a, physical leh written test patlang ve tho Mizo tlangval Laltluangkima, Darlawng erawh chuan re-medical test tur a a nghah mek thu a sawi a, MYC hmalakna a hetiang an thlen theih avanga an lawmthu an sawi bawk a ni.  

Chairman, Mizoram Youth Commission hmingin Zonal Army Recruiting Officer, Shillong hnena ngenna thlen a nih hnuah Army Recruitment 2018 hi MizoramahOctober 3-6, 2018 hian neih tura ruahman a ni tih thu dawn a ni a; hemi chungchangah hian Religious Teacher bik erawh chu All India level-a lak tur a nih bik avangin tun tumah chuan telh a la nih rih lo thu dawn niin, lak tura tih a nih veleh inhrilh hriat thuai a nih tur thu dawn a ni.

Tin, hetih mek lai hian Staff Selection Commission (SSC) buatsaih tur Central Armed Police Forces (CAPF) Constable (General Duty) Examination, 2018 atan dilna Online Registration hawn a ni tawh a; India ram pumah post 54954 a ruak a, chumi zingah chuan Scheduled Tribe (ST) mipa tan post 4325 leh hmeichhe tan post 588, a vaiin Scheduled Tribe pual post 4913 zet a ruak a ni.

Heng Army Recruitment leh SSC CAPF (Constable General Duty) Examination atana Mizoram Youth Commission-in Pre-Recruitment Training a buatsaih turah hian District tinah Deputy Commissioner theuh kaihhruaina hnuaiah hma lak a ni ang a; a tul ang ang buapuia thawk ho turin Mizoram Youth Commission (MYC) chuan Eastern Military Coaching Academy (EMCA), Aizawl a thawhpui dawn a. Sainik hotuten a theih ang anga MYC chu hmalakpui an inhuam thu an sawiin, a tulna apianga thawhpui turin MYC chuan CRPF leh Assam Rifles a sawm bawk a ni.