3379/2022-2023

MAMIT DC REPUBLIC DAY SPEECH MIZO.pdf
Mamit 26th January, 2023 : Vawiin khan ramchhung hmundangte rualin GSA Playground Mamit-ah India Republic Day, Vawi 74-na ropui taka hman a ni a. Pu Lalnunhlua, Mamit District Bawrhsap chuan hnam puanzar pawtpharhin, Parade Contingent te hnam puanzar chibai buk a chhang let.

Mamit District Bawrhsap chuan Mamit District chhunga Sorkar Department hrang hrang hnathawh leh hmasawnna te tarlangin Mamit District chhung mipuite Republic Day chibai bukin duhsakna a hlan.

Republic Day vawi 74-na, ni chhinchhiah tlak takah he ni lawm tura lo kalte leh Mamit District mipui zawng zawngte Republic Day leh kumthar chibai bukin, duhsakna a hlan a ni.

India ramin Danpui, Constitution kan neih tan ni, January ni 26, 1950 kha kan tan ni ropui leh chhinchhiahtlak tak a ni a, hemi denchhen hian kumtin Republic Day lawm thin a ni tiin, mipuite duhthusam leh beisei anga mitin intluktlanna, zalenna, inunauna leh inpumkhatna ram ni tura India ramin mahni-a inrelbawlna a neih theihna tura ram danpui lo duangchhuaktu ram hruaitu hmasate kha hre rengin kan rilruin zahna chibai buk ila. Kan ram danpui ropui tak leh khawvela Constitution tha berte zinga mi lo duangchhuaktu leh mi ropui kaltate leh ram mipuite thawhrimna zarah India ram chu khawvela sawrkar chak leh ropui zinga chhiar theihin a thang zel a. Kan ram ro inrelna kalphung leh a hlutnate humhim a, tichak deuh deuh tura kan rilrute siamtharin, inpekna rilru thar nen hmalam i thlir ang u a ti.

India ramin kawng hrang hranga hma a sawn mek rualin kan District pawhin hmasawnna hmel thar kan hmu mek zel a. Hmasawnna kawnga ke pen zel tura ruahmanna pawh department hrang hrangte'n chak taka kalpui zelin hun thar kan chuangkai mek zel tih mipuite pawhin a takin kan hmu theih a rinawm thu a sawi.

Vawiin Republic Day lawmna-ah hian Parade Contigent 14 awmin, school contingent 12, Armed contingent 1 leh unarmed contingent 1 an ni a. Parade commander hi Inspector B. Lalnunsanga niin 2nd Commander hi Inspector Laltleipuia a ni a. School contigents atangin lawmman pakhatna hi JNV Girls dawngin pahnihna hi St. Francis of Assisi Girls contingent an ni a. Pathumna hi Govt. Middle School III te an ni.

Republic Day, 2023 pual hian Pu Lalnunhlua, District Bawrhsap chuan Mamit District Hospital, Home hrang hrang Swadar Greh, Buannel Children's Home, Joshua Children's Home leh District Jail-te tlawhin thilpek a hlan a ni.