India Today buatsaih State of the States Awards 2016 ah Mizoram chu state tenau(Small State) zinga Health leh Economy Category ah te state dinhmun insiam tha ber Most Improved State lawmman pek a ni a, lawmman semna hun hi November ni 4 khan Delhi-a ITC Maurya ah buatsaih niin Mizoram Sawrkar aiawhin Finance Minister Pu Lalsawta’n heng lawmman te hi a dawng a ni.
Ramchhung chanchinbute zinga lar leh belhchian dawl India Today-in state-te dinhmun zirchianga, hmasawnna tehfung hrang hranga an tihthat dan buaipuiin heng te chawimawina State of States Awards hi kumtin an buatsaih thin a. Kumin hian tih dang pangngai thlakin Category hnih – Best Performing States (Big State and Small State) leh Most Improved States (Big State and Small State) lawmman te an siam a. Heng hnuaia hian a pumpuia tih tha ber (Overall); Economy; Agriculture; Health; Education; Infrastructure; Inclusive Development; Law and Order; E-Governance; Entrepreneurship leh Environment Category lawmman te siam a ni.
Best Performing States te lawmman atan hian kum 2013-2014 a hna an tawh dan leh hemi hun chhunga an mawhphurna an hlenchhuah dante (performance records) ngaihtuahin, category hrang hranga lawmman an siam a. Most Improved States te lawmman atan hian kum 2012-2013 leh 2013-2014 inkara an tehfung hrang hranga dinhmun san chhoh dan te thlirin, he lawmman hi an siam a ni. Small States zinga Most Improved States lawmman la te chu Puducherry (Overall, Law & Order, Agriculture); Mizoram(Economy & Health) Meghalaya(Education); Arunachal Pradesh (Infrastructure); Delhi (Inclusive Development); Tripura (E-Governance) leh Manipur (Environment) te an ni a.
Small States zinga Best Performing States lawmman la te chu Goa (Overall, Health, Infrastructure); Delhi (Economy, Inclusive Development, E-Governance, Entrepreneurship); Puducherry (Agriculture, Law & Order), Sikkim(Education) leh Meghalaya (Environment) te an ni.
