Lawngtlai District Swachh Bharat Mission (Gramin) chuan nizan khan Lawngtlaia LADC Hall-ah "Faina kawng zawh tur hian kan rilru kan inpeih tawk" tih thupui hmangin inhnial fiamna (debate) a buatsaih a. Lawngtlai DRDA Project Director Pu H.Dolianbuaia, Lawngtlai DC charge la mektu chuan he hun hi a hmanpui.

Pu H.Dolianbuaia chuan Swachh Bharat Mission hnuaiah India ram chu ram fai, thianghlim leh hrisel ni tura hma lak mek a nih thu sawiin, Lawngtlai District chhungah pawh SBM hi kalpui mek a ni, a ti a. Kumin chhungin inthiarna tha nei lote tan inthiarna in 1098 siamsak hman tum a ni tiin, Sangau RD Block chu zun leh ek thlahdah awm lohna (ODF) block-a siam tura hma lak mek a ni, a ti bawk.

He hun hi Nl. Jasmine Lalrinchhani, SBM (G) chuan a kaihruai a. SBM (G) Lawngtlai District Co-ordinator Pu Benjamin Lalrinzuala'n lawm thu sawina hun a hmang.

Inhnial fiamnaah hian Pu Elvis Lalthangzuala chu Speaker a ni a. Mover lamah Don Bosco School, Lawngtlai awmin, opposer lamah Downtown English School, Lawngtlai an awm thung a. Opposer lam hian hnehna changin, Francis C.Lalrohluzuala, Don Bosco School chu Best Debator-ah thlan a ni.