Nizan dar 7:00 khan Bethlehem Vengthlang YMA chuan an Branch YMA Library Silver Jubillee lawmna hun an branch YMA Library room-ah an hmang a, bialtu MLA Pu R.Vanlalvena chu khuallian niin a hmanpui.

Khuallian Pu R.Vanlalvena chuan, hmasawnna tluantling leh rintlak nei turin lehkha chhiar leh ziah taimak a tul tih sawiin, "Library chu mitin tan hriatna buhzem a ni a, mipuiten kan hman tangkai thiam a pawimawh," a ti a. Bethlehem Vengthlang YMA in Mizoram leh India ram district huap ang pawha Library tha lawmmawn dawng phak an nei thei chu tlawmngaia Library enkawltute taimakna leh veng chhung mipuite thawhhona that vang ani tih sawiin, Library chu zirlaite mai ni lo, mipuite pawhin nasa zawka chhawr tangkai a duhthu a sawi bawk. Pu Vena hian Library Computerization a hawng nghal bawk a ni.

Pu C.Lawmzuala, Mizoram Library Association President leh Mizoram University-a Librarian ni bawk chuan, "Sawrkar hmalakna zara Mizoram chhungkaw hrang hrangin RRRLF hnuaia Library kan nei thei chu lawmawm a tih thu leh Library tha nei tur chuan Branch YMA in hun lo kal leh zel turah pawh taihmak chhuah leh zel turin a ngen bawk.

Bethlehem Vengthlang Branch YMA Library ah hian lehkhabu 9666 awmin, Naupang leh Puitling lehkhabu hawh hun fel tak an siam a, kumin 2016-ah Library member 340 chuang an awm. Bethlehem Vengthlang YMA Library hian Mizoram chhung leh India ram chhung District-a Library tha inelnaah lawmman tum 4 lai an lo la tawh bawk a ni.

He hunah hian Pu Lalramliana, Mizoram State Librarian leh Mizoram Library Association O.B te bakah Library member te an tel bawk a, Inkhawm hi Branch YMA President Pu. Rohmingthanga'n a kaihruai a ni.