No.2884/2021-2022

Aizawl, 5th November, 2021 : India Independence vawi 75-na lawmna Azadi Ka Amrit Mahotsav(AKAM) puala Art & Culture Department leh Mizoram Cycling Asscociation te buatsaih, Azadi Ka Amrit Mahotsav India @75 Cycle Rally chu tukin zing dar 6:30 khan Pi Renu Sharma Chief Secretary-in Vanapa Hall kawtah a vailiam.

Vanapa Hall kawtah hian Art & Culture Director Pu R. Hmingthanzuala kaihhruaiin programme tawite hman a ni a. Chief Secretary chuan thu sawiin India ram zalenna kum 75-a lawmna atan Art & Culture Department-in programme a buatsaih chu lawmawm a tih thu a tarlang a. Kumin March ni 12 khan Azadi Ka Amrit Mahotsav India@75 hi Prime Minister-in a hawng a. Mizoramah pawh Art & Culture Minister Pu R.Lalzirliana hovin Govt.Aizawl College leh Govt.Hrangbana College zirlai te nen hemi zing hian Freedom Walk neih a ni a. April ni 1 khan Chief Minister hovin Vanapa Hall ah AKAM pual programme hman a lo ni tawh bawk a. Chuta tang chuan Art & Culture Department hian programme hrang hrang te buatsaihin chumi zinga pakhat chu he Cycle Rally hi a ni tih sawiin A&C Department hotute leh Cycling Association hruaitute chungah lawmthu a sawi a ni.

Cycle Rally-ah hian mi 75 an tel a. Vanpa Hall atangin hmar lam zawnga tlanin Chanmari-Ramhlun-Bawgkawn-Thuampui-Falkland-Chite-Mualpui te an tlan tlang hnu ah Silai Mual Trinity Hospital kawtah an tawp a. Pi Carol VLMS Dawngkimi, Jt.Director A&C in lawmthu sawiin Rally hun hnung a khar a ni.