No.2885/2021-2022
Aizawl Sahmulphah thla ni 5, 2021: Vawiin khan Lawngtlai Bawrhsap Dr Andrew H. Vanlaldika hovin a office chamber-ah sawrkar laipui ruahmannaa ram puma zirnain hma a sawn dan leh hmasawn ngaihna lai hriat nana hun bi neia National Achievement Survey (NAS) buatsaih thin chu kum 2021 atana Lawngtlai District chhunga kalpui dan tur sawi ho a ni.

He hunah hian Additional Deputy Commissioner Pu James Miahlung bakah, state leh LADC-a education department official-te, DIET Lawngtlai Principal/Nodal Officer leh JNV Sihtlangpui Principal leh DIPRO Lawngtlai te an tel a. NAS buatsaih ni atana sawrkar laipui hun ruat November ni 12, 2021-a Lawngtlai District chhunga sikul thlan bika exam buatsaih dan tur leh chumi atana pawimawh ruahmanna hrang hrang an siam a ni.

NAS-ah hian Class-III, V, VIII leh X zirlaite tan India ram pumah zawhna inang a ruala chhanna hun buatsaih thin a ni a. Kumin atan hian Lawngtlai District chhung bikah sikul 155 - Class-III-ah sikul 39, Class-V-ah sikul 30, Class-VIII-ah sikul 54 leh Class-X-ah sikul 57 - thlan chhuah an ni a. Sikul hrang hrang zirtirtute atangin sikul tina kal chilha exam buatsaih tur field investigator 241 leh observer 186 ruat an ni bawk a. Field investigator leh observer-te hi training pek vek an nih hnuah, sawrkar laipui atanga an kalna tur hmun an rawn thliar fel (randomise) anga harsatna awm lova exam an buatsaihna tur hmun an thlen theih nana ruahmanna siam dan tur pawh vawiinah hian sawi ho a ni.

Attachment

  • Loading attachment...