1749/2026-2027

Aizawl the 12th August, 2026: Food Civil Supplies & Consumer Affairs Minister Pu B.Lalchhanzova’n leng tura a sawm angin vawiin khan India Hmarchhaka Indian Oil hotupa ber Pu Nitin Bhatnagar, Executive Director IO-AOD chuan Minister hi a pisa-ah a hmu.

Minister chuan Mizorama Oil Depot bun a nih theih nana hmalakna kal mek chungchangah hmasawnna awm tawh te, hmalak zelna tur kawng te a lo sawipui a. Khuarel chhiatna thleng thei te, thenawm state-a buaina thleng palh emaw, chhiatna thleng thulhah, tuialhthei lakluh a harsat ṭhin avangin Mizoramin a dahkhawlna liantham Oil Depot kan mamawh tak zet a ni, a ti.

Minister chuan State sawrkarin Oil Depot siamna tur hmun engemawzat a enfiah tawh thu leh heng hmunte hi IOCL lam pawhin an rawn endik tawh thu a sawi bawk a. A theih dan awm thei apiang umzuiin Mizoramin Oil Depot a neih ngei theihnan theihtawp a chhuah zel dawn a, Oil Depot siam nan ram pawh a thlawna company hnena pek tur a awm tur thu Pu Bhatnagar hi a hrilh a. Prime Minister-in Mizoram a rawn tlawh hunah pawh lo thualnawn leh ngei a tum thu a Supply Minister B Lalchhanzova chuan a sawi bawk.

IOCL chuan Mizoramah Oil Depot din ngei an duh thu leh Mizoram Sawrkara FCS&CA department te nen an indawrna pawhin hma a sawn zel tih Pu Nitin Bhatnagar chuan a sawi a. Chief Minister leh Supply Minister ten hemi kawnga thahnem an ngaihna chuan rah tha a chhuah ngei a beisei thu leh, Company lam leh Ministry of Petroleum and Natural Gas hnenah pawh an theih anga hma an lak ve mek thu Minister hi a hrilh a ni.

Supply Minister Pu B Lalchhanzova hi FCS&CA Addl Secretary Dr Andrew H Vanlaldika’n a tawiawm a. IOCL a Deputy Manager Pu Z Lungdim pawh meeting-ah hian a tel a ni.