1973/2022-2023 

Champhai, the 17th September, 2022: Khawpui fai intihsiakna kalpui mek zelah vawiin chawhma dar 11 khan UD&PA Swachh Bharat Mission (Urban) buatsaihin Indian Swachhata Leaque - Youth Rally, thalaite pual fai inzirtirna leh faina hnatlang chu, 'Rally of Youth India Vrs Garbage' tih thupui hmangin Champhaiah huaihawt a ni. He hun hi District Bawrhsap Pu James Lalrinchhana chuan telpuiin hnatlang turte a vailiam a ni.

A hawnna hun Horticulture Complex, New Champhaia neihah Bawrhsap Pu James Lalrinchhana chuan India ram khawpui hrang hrang 1850 chuangah thalaite kaltlanga fai inzirtirna leh faina hnatlang Indian Swachhata Leaque - Youth Rally' huaihawt a nih thu sawiin, thalaite hmalakna zinga Champhai a tel thei chu lawmawm a tih thu a sawi a. Champhai khawpui tihmingthatu faina ngaipawimawha kalkhawm Champhai Nature Conservancy leh Govt. Champhai College Green Group NSS Unit  member-te bakah, Sawrkar hnathawk leh khawtlang hruaitute chu chhuanawm a tih thu leh entawntlak a tih thu a sawi a. Faina kawngah hma sawn viau tawh mah ila, faina tluantling leh tun aia hmasawn zawk ni tura tan kan lak chhunzawm zel a ngai a ni, a ti a. Faina chu thinlung atanga tan a ngaih thu leh nitin nunphunga lakluha zawm a ngaih thu sawiin, taksa leh rilru pawh a fai tel a tul thu a sawi bawk.

Champhai District mipuite chu zuk leh hmuam, ruihtheihthil laka fai tur leh nunkawng hrisel zawm tum tura sawmin, hriselna tel lovin engmah a tihhlawhtlin theih tak tak loh a, hei vang hian hriselna hi hmasawnna tura bultanna hmasa a ni, a ti a. Thalaite chu changkanna kawngah faina ngaipawimawh tel tura chahin, kan chenna khawpui a fai phawt chuan kan lo hrisel ang a, sum leh pai dehchhuah, zirna leh infiamna kawnga hmasawnnate a awm thei dawn a ni, a ti bawk a. Thalaite chu faina kawnga hmasawn tur leh rilrua faina chungchang vawng reng tura chahin Indian Swachhata Leaque - Youth Rally Champhai chu a hawng a ni.

A khuhhawnna hun tawi hman hi Pi R.Lalnunkimi, DUDO Champhai chuan a kaihruai a. Pu Lalrinpuia Varte, SP Champhai kaihruaiin faina thutiam lak a ni a. Champhai Nature Conservancy Adviser Pu Lalhlupuia'n lawmthu sawiin hun a khar a ni. Hemi hnu hian faina hnatlang neih chhunzawm nghal a ni a, Champhai Nature Conservancy (CNC) in New Champhai atanga Zotlang panna kawngpui dung an tifai a, Govt. Champhai College Green Group NSS Unit ten Zotlang leh Mualnuam inkar an tifai bawk a ni.

Youth Rally hmanga faina kawnga hmalakna kaltlang hian India ram khawpui 1800 chuang an inel a, Champhai khawpui chhung atangin team 2; Champhai Nature Conservancy (CNC) leh Green Group NSS Unit, Govt. Champhai College-te an tel a. Team member-te zingah hian thalaite tana faina kawnga entawn tlak tak takte an awm a, an ni kaihhruaina hnuaiah hian Youth Rally hi neih a ni a. Youth Rally-a tel tur hian thalai mahni thahnemngaihnaa inziaklut pawh an awm bawk a ni.

He inelna endiknan hian tehfung 3 siam niin, thalai thawk chhuak tam (scale of participation), hmalakna thar danglam bik neih (innovativeness & uniqueness) leh nghawng tha a neih dan (impact of the activity) ah endik a ni dawn a. Team ti tha thlante chu khawpui aiawhin national programme, Delhi-a neih turah an hmalak dan thate khawpui dangte hriat leh entawn tura chhawpchhuah theihna hun tha siam sak an ni dawn a ni.