Vawiin khan Aizawl North-I cluster huam chhunga mi 304 hnenah Industries department chuan NLUP 2nd installment a pe chhuak ve leh ta a. Bawngkawn YMA hall-ah Assembly Speaker Pu R.Romawia’n Local Council hrang hrang aiawhte hnenah a hlan a ni.

Vawiin-a NLUP sem ah hian Local Council 7 - Bawngkawn, Chaltlang, Durtlang North, Durtlang, Durtlang Leitan, Selesih leh Bawngkawn South atangin Automobile repairing thlangtu -11, Beauty Parlour-13, Blacksmithy-3, Cane & Bamboo-1, DTP-8, Electronics Repairing-16, Haircutting-5, Knitting-3, Petty Trade I-168, Petty Trade II-44, Petty Trade III-19, Photography & Videography-2, Shoe Repairing-5, Steel fabrication-4 leh Tinsmithy-2 hnenah a vaiin Rs.154.00,000/- sem a ni.

Speaker Pu R.Romawia chuan NLUP dawngtute fuihna thu sawiin miretheite tana ram leilung behchhan eizawnna ngelnghet siam chu NLUP thil tum a nih laiin thingtlang atanga khawpuia pem lut tam tak, mahni khua a let duh lo, khawpuia ram nei si lo te eizawn na tur ngaihtuah a tul avangin Industries hnuaiah trade siam belh a tul phah a, department sum ruahman lawkin a daih loh vangin Industries department hnuaia 2nd installment pawh sem tlai a ni, a ti a.

Mizo mipui te rilru puthmang a hmuh dan sawiin Pu Romawia chuan, Kohhran tan chuan neih chhun ang ang pekna thinlung kan pu a, YMA a nih chuan mahni thenawm hnaia tanpuingai ngawih ngawih puih nachang hre lemlo pawhin phur takin tanpuitu hna kan thawk peih a. Sorkar a nih erawh chuan kutdawh thinlung pu in mahni kawtkaia lei chhe te tla hlek pawh sorkar thenfai turah kan dah rilru tlat thin hi chu thlak danglam a ngai hle a ni, a ti a. NLUP dawngtu ten sorkar tanpuina an dawn chu thiam taka an hman chuan din chhuahpui na tham a ni, tiin retheih hi a retheih thlak em avangin sorkar-in NLUP hmanga retheite chhan chhuahna tur kawng a hawn chu lawm taka zawh a, sorkar beiseina ti hlawhtling ve ngei turin a chah a.Pi leh pute nunze tha, rinawmna leh taimakna te, chhelna leh midang tana inpekna te chawisan hi Mizo nationalism thil tum dik tak chu a ni, tiin hei hi NLUP pawhin a mamawh a ni, a ti bawk.

Inkhawm kaihruaitu Pu R.Selthuama, NLUP Implementing Board Chairman pawhin NLUP sum chu a tlem a tam lam emaw, khawi atanga lo kal nge tih emaw ah buai lovin a dawngtu ten an sum dawn chu a nihna tur anga hman leh sorkar thil tum tihpuitlin mai chu an tih tur a ni, tih a sawi a. Col.Z.S.Zuala, District Level Monitoring Committee Chairman, chuan cheng nuai 1 inpek ringawt chu tu tan mah thil awlai a ni lo, tiin Aizawl North I cluster tan Industries department hnuaiah ringawt pawh nuai 154 lai vawiin a sem chu helai bial tan hmasawnna tam tak thlentu a nih ngei a beisei thu a tarlang a. Pu J.Hmingthanmawia, Addl. D.C in lawmthu sawiin vawiin NLUP semna hun hnung hi a khar a ni.