4309/2023-2024

Dated Aizawl the 22nd March, 2024: Vawiin chhun dar 12:00 khan World Water Day 2024 lawmna chu Public Health Engineering Department (PHED) leh Central Young Mizo Association (CYMA) te tangkawp buatsaihin Vanapa Hall-ah neih a ni. Er. Lalhmingliani Hmar, Secretary, PHE Department chu khuallian niin he hun hi a hmanpui.

Kumin hian thupui atan 'Inrem nan tui' (Water for Peace) tih chu thlan a ni a, khuallian Er. Lalhmingliani chuan tui chu mitin mamawh vek a nih angin, chakkhai atana kan hmanna chi hrang hrangah, khawvel changkang zelin kan mamawhna pawh a ti tam ve zel a, tui duhkhawp hman tur kan nei lo chho tan ve dawna a lan avang hian kan hmanna hrang hrangah innghirnghona awm thei laka ta inhriatthiamna nen inrem taka kan awm tlan a ngai a ni tih a sawi.

Kumin World Water Day lawmnaah hian mi chi hrang hrang hnenah chawimawina leh intihsiakna buatsaih lawmman sem a ni a, tuihna humhalh kawnga mimal thawk tha mi 4 chawimawina hun neih niin, Pi C. Lalngaihsaki, Thaizawl (Lunglei District), Pu H. Lalramnghaka, Lamchhip (Aizawl District), Pu R. Lallianzela, Kepran (Aizawl District) bakah Pu Pachhunga, Thiak (Aizawl district) khuate chu chawimawina hun hlan a ni a, hei bakah hian Mizoram pum huapa WATSAN Committee thawk tha thlanchhuah nghal niin, Mizoram pumpuiah Mualthuam 'N' WATSAN Committee chu ti tha ber lawmman nihna pek niin, pahnihna atan Chhuanthar Tlangnuam WATSAN Committee thlan ni bawkin, pathumnaah Buarpui WATSAN Committee leh Vanchengte WATSAN Committee-te thlanchhuah an ni. Heng lawmmante hian chawimawina thuziak bakah memento a keng tel a ni.

World Water Day hi zing kara tang khan Aizawl Thunder-te nen tangkawpin khawpui chhungah kawngzawh/rally neih a ni a, district khawpui hrang hrangah pawh programme chi hrang hrang neiin ropui taka lawm a ni. Hemi ni hian mipui nawlpui tan intihsiakna hrang hrang, a huhova hnawmhnawk thiana intihsiakna Social Media challenge, Painting competition, One page comic design, jingle making Ieh sms slogan writing te buatsaih niin, intihsiaknaah hian mi thahnem tak an tel a, PHE Department chuan he intihsiakna a tel zawng zawngte hnenah lawmthu a sawi a ni.

Vanapa Hall-a World Water Day lawmna hun hi Engineer-in-Chief, Er. F.Liantluanga chuan kaihruaiin, Central YMA atangin President, Pu Lalhmachhuana chuan thu a sawi a ni. Thupui thlanchhuah, 'Inrem nan Tui' tih hmangin Er. Lalrothanga, Chief Engineer, PHED chuan thu sawi bawkin, Er. H. Duhkima, Director, PMU PHED chuan lawmthu sawinain he hun hi a khar a ni.

Kum 1992 atang khan United Nations General Assembly chuan khawvelah tui duh khawp leh thianghlim a awm zel theih nan leh tui awm sate venhim a, awmze nei taka hman a tulzia leh chumi kawnga mi zawng zawng kan thawh ho theihna turin March ni 22 hi World Water Day atan a ruat a, kum 1993 atang khan khawvel pum huap ni bik pawimawh World Water Day hian tui pawimawhna pho chhuak thei thupui thlang chhuakin urhsun taka hman thin niin, Mizoramah chuan kum 2012 atang khan hman tan a lo ni tawh a ni.