Vawiin atanga ni 27.5.2011 thleng awh tur Integrated Watershed Management Programme (IWMP) kalpui dan tur leh ruahmanna thar chungchang te, hnathawh dan tur kalhmang kaihhruaina leh Detail Project Report (DPR) siam dan chungchang zirhona chu vawiin zing dar 10.30 khan Rural Development Department Conference Hall-ah Rural Development Minister Pu R. Lalzirliana chuan a hawng. 
Pu R. Lalzirliana chuan, "Mizote hi hmanah chuan mahni kut-kawihin ei leh barah kan intodelh thin a. Tun hnuah erawh chuan hetiang lama mithiam tam zawk leh sum leh pai tam zawk nei chungin kan intodelh lo tial tial a. Plan mumal tak kan neih loh vang leh ruahmanna siamsa dungzuia hna kan thawh loh thin avangtein kan hlawhchham fo thin a ni" a ti. Central sawrkar ruahmanna hnuaiah Integrated Watershed Development Programme (IWDP) chu tun hma atanga sum tam tak senga lo kalpui tawh a nih thu RD Minister chuan sawiin, "Pawisa tam tak kan seng a; a hlawhtlinna erawh chu hmuh tur a awm lem lo. Thlai chinna tlak loh ram chhia te cheibawl a, ramngaw leh leilung hang thate humhalh chunga miretheite eizawnna ngelnghet siamsak chu IWDP thuken lian ber a nih laiin miretheite an la rethei chhunzawm zel a, kan ramngawte pawh a la chereu belh zel a ni" a ti a. IWMP hnuaia mawhphurtu Department hrang hranga thawktute chu rinawmna leh tih tak takna nena thawk tura fuihin, "IWMP hi project thar, kum 2028 thleng hawlh tur a ni a, pawisa pawh Mizoram-a kut hnathawktute dinchhuahna tham a awm dawn a ni. Chuvang chuan hei lehzel hi chu kan tihlawhchham thiang tawh lo a; miretheite chanai lo it ve tlat thin sawrkar hnathawkte chu dimdawi an ni lovang" Pu R. Lalzirliana chuan a ti bawk.

He training-a thuhmahruai sawitu Soil Conservation Society of India (SCSI) president Dr. Suraj Bhan chuan, "India ram puma thlai chinna ram hectare maktaduai 329 zinga hectare maktaduai 146 chu ruahtui van tlain a chawm a ni a; hectare maktaduai 183 chauh tuilakna hmanga chawm a ni. Hei vang hian kan ram thlai thar a lo pun lehzual theih nan ram chhe lai cheibawl a, eizawnna ngelnghet dinna atana siam hi India sawrkar chuan  tul a ti hle a. IWMP pawh hi chutiang atana duan chhuah chu a ni" a ti.

Training chhung hian phai lam atanga mithiam lokalte leh Mizoram sawrkar hnuaia officer-ten zirtirna an pe dawn a ni. Hawnna inkhawm hi Dr. O.P. Singh, Agriculture Director (Research & Education) chuan a kaihruai a; Pi Ramdinliani, RD Director chuan training huaihawttute aiawhin lawmthu a sawi.