Vawiin hian Serchhip District Steering Committee on Intensified Diarrhoea Control Fortnight te chu an Chairman Pi Sangchhin Chinzah, Bawrhsap hovin a pisaah an thukhawm a. Karleh ni 28th May atanga Intensified Diarrhoea Control fortnight (IDCF) hman dan tur an rel.

Pi Sangchhin Chinzah chuan,  India sawrkar thatna leh mipuite tana a inpek nasat zia hria a mipuiten sawrkar kan tawiawm that a tul thu a sawi a. Tunah pawh Kawthalo leh Tuihri vanga kan fate a bikin kum 5 hnuai lam ten natna an tawh loh nan engkim a thlawn vekin hma a rawn la leh dawn a ni. Kan district mipuiten he hmalakn hi lo thlawp tha a, khawtina VC, YMA leh nu leh pa te pawhin thawktute theihtawp lo chhuah pui turin ka ngen a ni, a ti.

Meeting ah hian Dr. Laldawngliana Sailo, CMO chuan IDCF chungchang sawifiah hmasain kum 2014 atanga  he hmalakna hi kalpui a nih thu leh India ramah naupang kum 5 hnuai lam kumtin kawthalo leh tuihri avanga boral an la tam thin avanga hmalakna hi neih a nih thu a sawi.

Meeting hian khawtina YMA leh VC te, Chanchinbumiteleh I&PR Department te  nen Awareness lamah tan ho ni se, school tinah Poster tar ni se, kawthalo laka himna leh kut sil dan inzirtirna lehkha sem ni se tiin an rel a. Heng bakah hian he Fortnight kalpui dan tur thuneitu sang zawk atanga ruahmanna awm te uluk taka kalpui ni se tiin an rel a ni.