FCS&CA, Fisheries etc changtu Minister Pu K.Lalrinliana chuan vawiin khan Kolasib khawpui chhunga Sawrkar hmalakna tur hmun hrang hrang a tlawh.

Minister chuan Kolasib Tourist Lodge thawmthat ngai lai te a en kual a, tun dinhmunah Room panga chu function theiloh avangin khar ani a, heng room panga te bakah hian a building thawmthat dan tur chu Tourism Minister Pu Robert Romawia Royte nen uluk taka enfiah in mithiam te rawn chungin hmalak dan tur an ngaituah dawn ani. Hemi bakah hian Kolasib Sports Complex, venglai field, Project Veng a harsatna awm neuh neuh te zirchiangin hmalak dan tur an sawiho bawk.

Hemi hnu hian Sports & Youth Affairs Minister Pu Robert Romawia Royte leh Mamit bialtu MLA Pu H.Lalzirliana hoin Regional Sports Training Centre (RSTC), Saidan chu an tlawh a, he hunah hian Kolasib District a Sports Association hrang hrang hruaitute nen inkawmhona hun hmangin, RSTC Saidan chu Regional Sports Authority of India (SAI) Academy a tana Sawrkar Laipuiin a pawm thu tarlan ani a, he hmunah hian naupang 100 bawr velin Sport Discipline hrang hrangah mithiam te hnuaiah training an nei thei dawn a, Saidan football ground ah phul lem (Artificial Grass) phah ani dawn a, Sports promotional fund a tana Kolasib District in kum khata cheng 206000/- (nuaih hnih sang ruk) an dawn thin chu tihpung tura hmalak a nih tur thu tarlan bawk a ni.

Pu K.Lalrinliana chuan tun dinhmunah Mizoram in tuialhthei (oil) dah khawlna tur hmun pakhatmah a neiloh thu tarlangin Oil Dahkhawlna na tur hmun a tan Bairabi ah hmalak mek a nih thu a sawi a, Tumpui khelmuala pavilion sak that leh Indoor Stadium sa tura ruahmanna awm chu Sports Minister hoin a map zirchian a nih thu a sawi bawk, Minister chuan chanchinbu mite zawhna chhangin Kolasib District Hospital tihchangtlunna tur proposal chu 15th finance Commission ah thehluh fel ani tawh tih sawiin ENT leh Surgoen  chungchangah pawh hmalak mek zel a nih thu a sawi a ni.

Minister chuan bialtu a nihna angin theihtawp a chhuah zel dawn a, Sawrkar pawhin Kolasib district tih hmasawn nan kawng hrang hrangin hma a la chho zel a, hemi kawngah hian mipuite chu thawhpuiah a sawm a, thawhhona thatak hnuaiah hmasawnna chi hrang hrang a thleng thei dawn ani tiin, Zirna leh infiamna lamah pawh Kolasib District thalaite chuan thiehna sang tak an nei a,  hlawhtlinna kawng an zawh theihnan nu leh pa, khawtlang hruaitute leh Game Discipline hrang hranga Association hruaitute chu theihtawp chhuahpui turin a sawm bawk a ni.

Attachment

  • Loading attachment...