Vawiin khan Mizoram State Sports Council Ruby Jubilee Commemorative Inter District Women Football Championship kharna inkhawm chu Pu T.Sangkunga, Chairman, Mizoram Youth Commission chuan Rajiv Gandhi Stadium Mualpuiah a hmanpui.

Pu T.Sangkunga chuan Mizo hnam tlemte hian India ramah infiamna lama India leh khawvel hriat hlawh khawpin hma a sawn chu sawrkar hmalakna avang leh infiammite thahnemngaihna vang a ni, a ti. Sports discipline tam tak zingah Olympic Games leh khawvel huap inelna a langsar tak, amaherawhchu India rama an bawh ve loh discipline lam uar tha a tih thu MYC Chairman chuan a sawi a. Infiamna lama hmakhaw eng tak an neih hria a Mizo hmeichhiaten hei aia uar lehzuala infiamna luhchilh se a duh thu a sawi a ni.

FIFA leh AIFF (All India Football Federation) chuan hmeichhe football a ngai pawimawh hle a. Hei hi hriaiin Mizoram Football Association (MFA) chuan District hrang hrangte inelna Women Football Championship hmasa ber hi an rorelna sang ber General Body meeting-ah neih nise tiin a rel a. Aizawl District Football Association (ADFA) kutah dahin an ni hian hlawhtling takin an buatsaih a ni.

Tournament ah hian Aizawl, Champhai, Serchhip leh Saiha District hmeichhe football team-te an tel a. Final-ah hian Champhai leh Serchhip intumin Serchhip hian penalty hmangin hnehna an chang a ni. Champion team hian trophy leh certificate an dawng. Serchhip team a mi K.Lalruatfeli top scorer niin best player atana thlan a ni bawk a. Fair Play award chu Champhai team ten an dawng thung. Team tel zawng zawng hian participation price Rs. 7500 an dawng theuh a ni.