Vawiin ni 10th December 2012 hian D.C Conference Hall, Mamit-ah International Anti-Corruption Day 2012, chu urhsun takin hman a ni a. Inkhawm hi Pu R.S Lalzamliana Addl D.C Mamit-in a kaihruai a ni.

He Day hmanpuitu, Pu V. Lalremthanga IAS, District Bawrhsap chuan International Anti-Corruption Day 2012 chu December ni 9 a nih thu leh hei hi Pathian ni anih avanga 10th December 2012 a hman a nih thu sawiin he day hmang tura lo kalkhawmte chungah lawmthu a sawi bawk.

Bawrhsap chuan Hlemhletna dona kawnga sawrkar leh Tlawmngai pawlte hmalakna chu fakin mipuiten eirukna kawnga in hnamhnawihte endawng nachang kan hriat a tul a ni a ti a, hetih rual hian sawrkar hnathawk zawng zawngte hi hlemhletna kawnga in hnamhnawih vek tura kan ngaih chuan a dik lo a ni tiin hemi kawnga fihlim mi thahnem tak an awm tih kan hriat a tul a ni a ti bawk. District Bawrhsap chuan hlemhletna kan dona kawngah hian mipuite te pawhin kan Society-ah thuk zawka kan rilru kan pek a, neitu rilru kan put a tul a, chu chuan dik lo taka sum chingpen tur a veng dawn a ni tiin kalkhawmte chu tun atanga hlemhletna dona kawnga hma la sauh sauh turin a chah bawk.

International Anti- Corruption Day 2012 denchhena Higher Secondary School naupangte tan Essay inziahsiak English leh Mizo-a buatsaih Result puan niin 1st - 3rd thleng lawmman siam a ni a, English-a 1st-na chu Jessi Lalhmingmawia Cl-XI GHSS Mamit niin Mizo-ah 1st-na Vanlalhlimpuia Cl- XII GHSS a ni bawk.

College zirlaite tana Debate Competition, Thupui “ Kan ramah hian Corruption hi tihbo theih a ni” tih hmanga buatsaih ah ‘ Kan ramah hian Corruption hi tihbo theih a ni lo’ tih lamtangin hnehna changin Best Debator-ah Rodinsanga thlan a ni.

Lawmman te hi District Bawrsap-in a hlan a ni.

He hunah hian Pu Robert Zoramliana, President Prism, Sub Hqrs Mamit pawhin Corruption in kan khawtlanga ngawng a neih dan chipchiar takin a sawi bawk a ni

He Day hmanna-ah hian khawpui chhunga Heads of Offices, V/C Members leh thuthar thehdarhtute an tel a ni