Khawvel hmun dang rualin International Day for Biological Diversity chu Mizoramah vawiin khan hman ve a ni a. He ni lawmna inkhawm, Assembly Annexe Conference Hall, Aizawla neih chu Home Minister Pu R. Lalzirliana’n a hmanpui a ni.
Minister chuan ramngaw leh nungchate hlutna ngaihthah zawnga khawvelin hmasawn a tum vangin harsatna tam tak a tawh chhoh mek thu a sawi a. Mizoram chhungah ngei pawh ramngaw tih chereu vangin tui hna te a kang tan a, sava pem chi tam tak hmuh tur awm thin pawh tunah chuan Mizoram rawn pem luhna chhan tur an nei mang tawhlo a ni, Pu R. Lalzirliana chuan a ti a. Chutirualin Mizoram chu Biodiversity-ah kan hausa hle a, thilnung chi thar (new species)-te hmuh thar a ni zel a, India ramah pawh ramngawchin (forest cover) nei tha ber pawl kan ni bawk a. Heng kan hausaknate hi zirchian leh humhalh lamah tan kan lak a tul a ni, a ti.
Pu R. Lalzirliana chuan ei leh bar a hmasawnna kawng hrang hrang te pawh ramngaw leh nungcha tichereulo zawngin kalpui zel turin kalkhawmte chu a chah a. Sorkar flagship programme NLUP pawhin intodelhna mai bakah ramngaw leh nungchate humhalh a ngaih pawimawh thu a tarlang bawk a. India Danpui pawhin mitin in ramngaw leh nungchate humhalh turin min phut vek thu Minister chuan sawilangin, hemi kawnga tlawmngai pawl hrang hrangte hmalakna chu lawmawm a tih thu a sawi bawk.
Kumin International Day for Biological Diversity hi “Island Diversity” tih thupui phuah a ni a. He ni denchhen hian milem inziahsiak lo buatsaih tawh niin, High School pariat (8) an tel a. He milem inziaksiak a tithate hnenah vawiin khan Khuallian Pu R. Lalzirliana chuan lawmpuina pawisafai leh Certificate a hlan a ni.
Vawiin hun hi Pu Lalramthanga, PCCF & Principal Secretary, E&F Dept. chuan kaihruaiin, Pu Lalrinmawia, Conservator of Forests (WL) hnen atangin report ngaihthlak a ni a. Pu H. Duhkima, SE, PHE leh Dr. Lalneihpuia Chhakchhuak, Technical Assistant, E&F te hnen atangin tui hna leh nungcha humhalh pawimawhzia chungchanga thuziak an buatsaih chu zirho a ni.
Kumin International Day for Biological Diversity lawmna hi National Biodiversity Authority, Chennai-in state tinte a remchan dan anga hmang tura a ruahman angin State Biodiversity Board, Environment & Forest Department-in a buatsaih a ni.
