Mizorama English Medium School hmasa ber Helen Lowry Higher Secondary School chuan vawiin khan kumina HSLC leh HSSLC pass tharte tan Graduation Day an hmang a, Hrangturzo biala MLA thlanthar Pi Vanlalawmpuii Chawngthu in a hmanpui.

Khuallian Pi Vanlalawmpuii chuan thu sawiin,Helen Lowry Higher Secondary School, ama zir chhuahna ngei sikul a khuallian a nihna hmasa ber ah Graduation Day tum-19 na a hmanpui thei chu a lawm takzet tih a sawi a, amah pawh he hmuna a zir laia lehkha thiam theilo ber zing ami ani chungin, zirtirtute fuihna leh kawhhmuhna tha a dawn chuan hetiang dinhmuna din tir thei tu anih thu a sawi. Pi Vanlalawmpuii chuan thiamna chu pawimawh mahse mipuitling ni turin tumruhna leh thawhrimna chu hlawhtlinna thlen tu tak tak zawk ani tih hre reng turin zirlaite a fuih ani.Khuallian hi Helen Lowry Higher Secondary School chhuak zinga hmeichhe MLA tling thar anih lawmpuina thilpek hlan ani.

Graduation Day hi Pu Lalhlimpuia Kawlni, Education Director, Mizo Conference of Seventh Day Adventist chuan khual zahawm niin a hmanpui bawk a,hetah hian Principal Pi Lalthangzovi chuan an sikul din tirh atangin zirna an kalpui kawngah admission naupang ti hmasa apiang eng division pawh thlei bik nei lova an lak thin thu a sawi.

Helen Lowry Higher Secondary School hian kumin HSLC ah 100% passed in, Top 10 ah 2 an tling a,HSSLC ah 84 % an passed bawk ani.Helen Lowry Higher Secondary School hi American Missionery Pi Helen Lowry in Helen Lowry School tih hming pu in 17th january ,1950 khan a din a ni a. Hemi kum hian khatih hun laia Superintendent of Mizoram Mr.S.N. Barkataki a fate leh Assam Rifles officer fate- zirlai 10 nen bultanin, District Superintendent Bungalaw, tuna Raj Bhawan ni ta ah hian din ani.