Vawiin chawhma khan Saikuti Hall Lunglei-ah District Working Committee On Total Literacy Drive buatsaihin International Literacy Day 2017 chu Lunglei SP Pu Lalthafamkima Jongte, MPS hova hman a ni.

Pu Lalthafamkima Jongte, chuan thu sawiin International Literacy Day hi Khawvel puma ni pawimawh tak a ni, a ti a. Khawvel ram hrang hrang in ziak leh chhiar lam a hma la in, a bik takin ziak leh chhiar thiam lo ram ah tan lak a ni tiin Kum 2020 hma in Khawvel pumpui ah ziak leh chhiar thiam tir vek tum a ni tih kalkhawmte a hrilh a. Kumin International Literacy thupui “Literacy In A Digital World” anih angin kan duh emaw kan duhlo emaw Digital Khawvel ah kan awm a, chuvangin kan zirthiam a ngai ani a ti, sawrkar hnathawh leh sumdawnna ah pawh hetiang lam thiam nih a tul thu a sawi bawk. Literacy tih hian reading, writing leh arithmetic thiamna kalsan in digital ah kan lut a, kan nun pumpui hi mobile phone in min thlunzawm avangin min thuhnuai tawh a, zirlai ten mobile phone leh internet hi zirna ti buai zawng a hmang loin zirna puih thei zawng a hmang turin a fuih a. Mobile phone hi kan hman sual chuan thilsual a ni a, kan hman thiam chuan thil tangkai tak a ni thung a ni tiin Central Service tling thei khawpa zirna lama tan la thar theuh turin zirlai kalkhawm te a chah a ni.

Pu Micky Lalenkawla, DPC SSA leh Secretary DLWC for TLD, Lunglei in thuhma sawiin International Literacy Day hi UNO peng pakhat UNESCO in  kum 1966 atangin 8^thSeptember ah hman tur in a ti a, Mizoram ah pawh  he ni hi kumtin hman a ni. Mihring nunphung, khawsak leh hnathawhna thleng in Digital World hian a tuam mek a, puitling lehkha thiam lo te zirtir a, naupang sikul kallo te nu leh pa ten kal tir theuh turin a duh a, ziak leh chhiar thiam lote duat leh hmangaih takin kan finna leh kan thiamna te an tan I ui lo ang u, a ti.

Pu J Lalmuankima MPS, Addll. SP, Lunglei in cyber crime hmansual chungchang leh a hrem theihna dan te sawina a nei bawk. Inkhawm hi Pu H. Zahmingliana District Adult Education Officer in kaihruaiin Pu PC Lallawmzual, Dy DPC, RMSA in lawmthu sawina a nei a ni.