566/2025-2026

Dated Aizawl the 13 May, 2025 : Nimin (12-May-2025) khan Khawvel Puma Nurse-te ni  (International Nurses Day) chu Mizorama District hrang hrangah pawh hman ve a ni a. Aizawlah chuan he ni hi  Civil Hospital-a hman niin, Pi Mary Ramte Pachuau, Deputy Director, Directorate of Nursing  chuan khuallian niin a hmanpui.

Khuallian Pi Mary Ramte Pachuau, Deputy Director, Directorate of Nursing chuan kalkhawmte hmaah hian thusawiin, Nurse-te chu  damlo an enkawlna kawngah mahni inphat chunga theihtawp chhuaha hna an thawh phawt chuan, Health Care system leh ram sum leh pai dinhmun tisang turin theihna an nei a ti a. Mizo Nurse te chu an tha tawk em em tih sawiin, ramdang ah pawh Mizo Nurse hnathawk, mi 111 lai an awm mek bakah ram chhung hmun hrang hrangah phei chuan mi 760 chuang an awm mek tih a tarlang a. Khawvel hmun hrang hranga nurse mamawhna chu a san tial tial avangin theihtawpa heng mamawhna phuhru  thei tur hian  Mizo nurse te chu theihtawp chhuah turin a fuih bawk a ni.

Pi Lalrintluangi Nursing Superintendent, Civil Hospital, Aizawl pawhin thu sawiin, thawktute himna leh an damlo enkawlte nen an inkara harsatna thleng thei chungchangte a sawi a. Damlo enkawltu zaa 24 te chuan an hnathawhna kawngah an enkawlte leh mi thenkhatte lak atangin harsatna  an tawk thin tih tarlangin, Covid lai phei kha chuan zaa 70 lai a kai chho tih a sawi a. Nurse ten harsatna an tawh theih hrang hrangte tarlangin, chutih rualin  Nurse te pawh an hna chu ngaiah nei mai lo tur leh an hnathawh ah inpe thar fo zawk turin a chah nghal bawk a ni.

Nimin International Nurses Day puala kalkhawmte hian he ni pual hian thutiama inhlantharna hun an hmang nghal bawk a ni.