Khawvel hmun dangte rualin International Nurses’ Day chu vawiin khan Mizoram pumah hman a ni a. Trained Nurses Association of India, Mizoram Branch huaihawtin he ni lawmna Civil Hospital Conference Hall, Aizawla buatsaih chu Health Minister Pu Lal Thanzara’n a hmanpui a ni.
He ni hmang tura nurse rual kalkhawm hmaa thu sawiin Health Minister chuan nurse indaihlohna vanga khum leh hmanraw hrang hrang awmsa vek damlo mamawh ngawih ngawih ten an hmang tangkai theilo chu vanduaithlak tiin, indaihlohna zualpui phuhru turin chak takin hmalak mek a ni, a ti a. Cabinet-in nurse 70 lak a phalsak atangin tunah 20 lak tur a tih mek a nih thu a sawi bawk a. Minister chuan nurse-te chu indaihlohna kara tlawmngaih chhuaha damlo khum an vil thin chu fakawm a tihzia sawilangin, nurse-te bakah hospital thawkte chu faina kawngah hmasawn zel turin a fuih nghal bawk a ni.
Vawiina Nurse-te Ni lawmna inkhawm hi Health Principal Director Dr. K. Ropari, Hospital & Medical Education Director Dr. Lalbiakkima leh sawm bik ten hun an hmanpui bakah nurse pensioner tam tak an tel a. Pi Lalfamkimi, Trained Nurses Association of India, Mizoram Branch President atangin kumin atana an thupui thlan ‘A force for change, a vital resource for health’ sawifiahna ngaihthlak niin, chawhnu lamah variety programme in a chhunzawm nghal a ni.
