3783/2022-2023

Aizawl, 8th March ,2023: Vawiin khan International Women's Day, 2023 puala AIKO buatsaih chu Hotel Regency Conference Hall-ah hman a ni a, I&PR Minister Pu Lalruatkima chu khuallian niin he hun hi a hmanpui a, International Women's Day, 2023 thupui hi 'Embrace Equity' a ni.

Khuallian Pu Lalruatkima thu sawiin khawvel pawhin a ngaihpawimawh em em International Women’s Day hman a ni chu a lawmawm a tih thu a sawi a. He ni hi khawvel pawn a ngai pawimawh em em a, he ni ah hian hmeichhia ten harsatna an tawh hrang hrang, an hnathawh na ah te, hlawh zat bituk kawng ah te, healthcare leh zirna kawng te bakah ram leh khawtlanga hruaitu nih theihna kawngah te khawvelin a zir chiannaah thil siamte hian chanvo inang kan nei a ni tih a ni a ti a. Minister chuan tun dinhmunah chuan hma kan sawn tawh hle in a lang a, ram leh khawtlang hruaituah pawh hmeichhia an awm ve ta nawk mai a, office-ah te pawh hmeichhe officer kan ngah em em a, zirna lamah lah ni se hmeichhia ten hma an hruai deuh zel tawh a ni a ti a. Hmeichhia te hi fak an phu a, inchhungkhur chhung chet zawng zawng an kut a ni a, khawsak rel nen, naupang buaipui nen, heti chung chung pawh a heti khawp a hma an sawn  thei hi, mipa te hian inzirna tur tam tak kan nei a ni a ti a. Khuallian chuan “Mipa ropui tak phen ah chuan hmeichhia an awm thin,” ti te pawn an lo sawi hial thin a ti a. Mipa te hian keimahni chauh chuan kan nih tur ang hi kan ni phaklo fo thin a, Pathian pawh in mipa tanpui turin a kawppui tur awm mi hmeichhia ka siam ange, a lo ti reng a ni a ti a.

Minister chuan Artificial Intelligence System in a zirchianna ah chuan za zela 44 ah chuan mipa leh hmeichhe in thliarna a awm a hriat a ni a, khawvel ram 125 a hmeichhe journalist te an survey na ah chuan 73% te chuan an hnathawhna ah online a invaukhanna (violence) an tawk thin ni a hriat a ni bawk a ni. Heng thil te hi UN in a la thutak viau mai a, tun kum International Women’s Day Theme atan pawh Embrace Equity tih a thlang hial a ni a ti a. India sorkar pawn hmeichhia te dikna chanvo hi a ngai pawimawh hle mai a, Women Commission te din in, Municipal Corporation ah te pawh seat reserve sak hial a ni tawh a, hmeichhe councellor te pawh mipa aia an duai na bik engmah hmuh tur a awm lo a, ram rorelna politics-ah pawh reservation hmeichhia ten an neih hi ngai hlu in, kan tel ve na tur a ni tiin hmeichhia ten tan la zel turin duhsakna a hlan a. Khuallian chuan Pathian hian mipa leh hmeichhia a siam a, in mamawh tawn kan ni a, mipa amahin a kal theilo a, chutiang bawkin hmeichhia pawh amah in a kal thei heklo a, chuvangin in zah tawn a, tanpui kan ngaihna laia kan in tanpui tawn zel hi a pawimawh lai chu a ni. Hmeichhia a awm nem zawk te hi kan duat thiama, hmeichhia te pawn Pathian min siam chhan hre rengin in chawimawi tawn tur kan ni tih kan hriat reng a pawimawh a ni a ti a, kumin 2023 International Women’s Day hmangtu zawng zawng te duhsakna a hlan a ni.

Khuallian Pu Lalruatkima chuan Mizo hmeichhe chhuanawm te- Padma Shree Pi B.Sangkhumi, Pi Lalriliani, Pi Marlee Vankung leh Er. Lalhmingliani te hnenah chawimawina thilpek a hlan nghal a ni.

He hun hi Pu R.Vanlalena, Adviser AIKO chuan a kaihruai a, Pi Maggie L.Ralte, Chairman AIKO chuan kalkhawmte hi a lo lawm a ni. He hunah hian CYMA, MHIP, MUP, MJA leh pawl dang aiawhte pawh an tel a ni.

AIKO hi kum 2010 ah din a ni a, Japanese tawng atanga lak a ni a, lehlinah chuan Naupangte Hmangaihtu tih a ni, an din tirh hian naupang te dikna chanvo humhalh kawngah hma nasa takin a la a, he pawl hian hmeichhia te hamthatna kawngah hma lak belh zelin tun dinhmunah Vaivakawn Police Station-ah Family Counseling Centre an nei a, Central Jail-ah hmeichhia te tan Programe hrang hrang an buatsaih thin a ni. Hmeichhia ten engkawngah pawh harsatna, leh rahbehna an tawh changin free legal service a pe thin a ni.