3782/2022-2023

Aizawl, 8th March ,2023: Social Welfare & Tribal Affairs Minister Er. Lalrinawma chuan vawiin khan PHQ Multipurpose hall, Khatla ah khuallian niin International Women’s Day kharna hun a hmanpui.

Khuallian Er. Lalrinawma chuan hmeichhiate ropui zia sawiin khawvel pum huapin ‘Hmeichhiate ni’ neih hi an phu hliah hliah a ni a ti a, Pathian thilsiam ropui hmeichhiate pawimawhzia hi inzirtir leh inhrilhhriat fo a pawimawh thu a sawi. Minister chuan hmeichhe pawl hrang hrang leh tlawmngai pawlte inpekna leh thawhrimna chu fakawm a tih thu a sawi. Mizoramah an dinhmun tha chho zelin mi tamtak chawikan ni tawh mahse tan lak a la ngaih nasat thu a sawi. Hmeichhiate chawikang leh dawmkang tur chuan hmeichhia te kutah a innghat thui hle a, chhungkua leh khawtlang ah hmeichhe zahna inzirtirna tam se, hmeichhe rahbehnate a kiam duak a rin thu sawiin, Mi thenkhat an zalenna dar rik hnu pawha tlanchhuah nachang hre lo, Pathian remruat emaw ti tlatte chu hrilhhria a chawikang zel turin kalkhawmte a fuih bawk a ni. Hmeichhe zalenna ram chu ram changkang a nih thu sawiin chhungkua leh fanaute ah bultan chuan hmeichhiate zalenna chu chhungkaw tinin an hmuh ngei a rin thu a sawi.

Kumin hian International Women's Day kum dang ang lo takin kar khat chhung hmang tura Ministry of Women & Child Development in an rawn tih angin, Mizoramah pawh Directorate of Women & Child Development, Social Welfare & Tribal Affairs Department chuan 1st-8th March chhung hian programme hrang hrang buatsaih in hman a ni.

March ni 1 khan IWD karkhat chhunga hmanna tur hun hawnna Minister Er. Lalrinawma office ah, Hmeichhe pawl hrang hrangte leh Mizoram University lama Women's Studies Centre lamte nena hman a ni. Programme kal zelah, March ni 2 Ieh ni 6 khan Government Aizawl North College leh Government Aizawl West College-ah Gender Sensitization neih a ni a, kumina thupui hmeichhia leh mipa-te intluktlanna thu bakah Mission Shakti Scheme hnuaia sub-scheme hrang hrangte chu sawizauna neih nghal a ni. Tin. March ni 3 Chapchar Kut ah pawh khan International Women's Day pual hian Photo Booth siam a ni a, mipui-in an hlut hle a ni. Heng bakah hian School Education leh Higher & Technical Department-te hnenah International Women's Day puala thuziak siamte chu Zirna In hrang hranga lo thawn darh tura thawn chhuah a ni. Heng programme bakah hian Video Clip, "Intluktlanna Chhungkua-a tan” tih thupui hmangin competition buatsaih a ni bawk.

Vawiin ni-8 hi International Women's Day a nih angin, karkhat chhunga programme kharna neih a ni a. He hunah hian Social Welfare & Tribal Affairs Department-a Additional Secretary, Pi Donnie chuan inlawmna thu tawi a sawi a ni. Vawiin programme-ah hian Mizo hmeichhia pahnih; chawimawi phu tak Padma Shree pawh lo dawng tawh, rimawi khawvela mi hriat hlawh, Pi K.C. Runremsangi leh hmeithai te leh chanhai zawkte lo pui thin tu, Hmeithai Association dintu ni bawk, Pi Veronica Zatluangi te hnenah Chawimawina  hlan nghal bawk a ni.