Naktuk November Ni 28, 2018 a MLA inthlanpui neih tur inpuahchahna chu a hmawrbawk niin Champhai District chu inthlang turin a inpeih ta.

Champhai District chhunga Polling Station 137-a duty tur Polling Official-te leh Sector Officer ruatte chuan tukin zing dar 5 atang khan duty-na tur panin an chhuak tan a, lam hla deuh chhuak hmain khawpui chhung leh  a chhehvel hnai deuhte pawh  chawhnu lamah chuan  an chhuak fel vek a. Polling Party tinah hian Presiding Officer, First, Second, Third Polling Official leh Security personel an awm zela, team tinte hnenah hian inthlanna hmanraw hrang hrang leh EVM, VVPAT te ECIL Engineer-te endikna hnuaiah hlanchhawn an ni.

22-Tuichang (ST) A/C leh 25- E. Tuipui (ST) A/C  a duty turte chu District Panchayati Resources Centre tual zawl atangin an chhuak a,  21-Lengteng (ST) A/C leh  23- Champhai North (ST) A/C a duty turte DRDA Office tual atangin an chhuaka, 24-Champhai South (ST) A/C a duty turte DC Office tual atangin an chhuak ve thung a ni.

Champhai District chhunga Polling Station 137 zinga 126 ah te inbiakpawhna a that laiin Polling Station 11 dangah te a awm loh emaw, awm that loh avangin MPRO hmanga inbiakpawhna siam tum a ni a, Darkar hnih bi dan zelah Polling station tin ten vote tla zat reportna  tur Pollstar ti a  vuah  hmangin  an pe  zel dawn  a ni.
21-Lengteng A/C-ah BU-42,  CU-44 leh VVPAT-43 hman tura tih niin,  22-Tuichang A/C-ah BU-40,  CU-42 leh VVPAT-40 hman tura ruahman a ni a,  23-Champhai North A/C-ah BU-46,  CU-49 leh VVPAT-46 hman tura tih a ni a,  24-Champhai South A/C tan BU-39, CU-41 leh VVPAT-39 hman tura ruahman niin,  25-East Tuipui A/C-ah BU-45,  CU-47 leh VVPAT-45 ruahman a ni bawk.

Electoral Final Roll 2018 tarlan danin Champhai District-ah voters 84705 an awm a, heng zinga 42820 hi Hmeichhia niin 41885 chu Mipa an ni a. Mipa leh Hmeichhe voter inthlauhna hi 935 a ni. 23-Champhai North A/C a Polling Station 30 awmah voters tam berin voters 18486 an awm a, a tlemna ber chu 25-East Tuipui A/C niin Polling Station 29 ah voters 14835 an awm a. 21-Lengteng A/C hnuaia Polling Station 27 ah Voters 17165 awmin, 22-Tuichang A/C hnuaia Polling Station 26 ah voters  16195 an awm a, 24-Champhai South A/C hnuaia Polling Station 25 ah voters 18024  an awm bawk a ni.

Inthlan kaihhnawiha   harsatna, zawhna leh mamawh thlen theihna tur District Control Room-ah thlen zel theih a ni a, a biak pawh theihna number chu 03831-234402 (Landline), 7629877660 (Mobile) leh 7638928848 (Mobile) a ni a, heng number tarlan te hi engtiklai pawha biakpawh theih reng a ni.

Champhai District chhungah Polling Station 137 awmin Polling Official 720 an duty dawn a. Polling station a duty turte hian Master Trainers kaihhruaina hnuaiah  Election Form pawimawh dah khah dante, EVM khawl hman dante, Polling day activities leh tul dangte an training vek a ni.