Kan hmalawk a Mizoram MLA Inthlanpui lo awm tur atan Mizoram Police Department chuan Election Commission of India kaihhruaina angin venhimna lamah pawh inbuatsaihna tha taka kalpuiin a vawrtawp a thleng mek a. District hrang hrang a SsP ten kan hotupa ber Pu Balaji Srivastava IPS, DGP Mizoram kaihhruaina hnuaiah venhimna lama ruahmana felfai taka siamin tunah chuan Unit hrang hrang te kan inbuatsaihna-ah Inthlanpui muanawm tak leh felfai taka nei turin kan in peihfel thawkhat ta a ni.
Tun tum inthlanpui neih turah hian Mizoram-ah venhim ngai bik (vulnerable areas) 36 leh Critical Polling station 47 te District panga ah awmin heng hmunah te hian Mizoram Police leh CAPF te duty tir mek zel a ni a. Tin, Bru mipuite tan Special Polling Station 15 chu Kanhmun, Mamit District-ah siam a ni bawk a. Mizoram pumah Kumin Inthlanpui atan hian Polling station 1179 a awm a ni.
Tun tum Inthlanpui inbuatsaihna kalpui mek zingah tunah hian Mizoram Police te leh State dang atanga Force(CAPF) lokal ten Duty hrang hrang heng, Static Surveillance Team, Flying Squad, Quick Response Team, Patrolling, Naka/Checkpost, Zonal Police Officers, Sector Police Officers, EVM Strongroom Guard, Candidate leh Observer-te PSO hna te thawkin duty uluk takin kalpui mek a ni a. Hei bakah Police Officer; DIG panga(5) te Grid Officer-ah ruat niin Mizoram pum a security duty te an vil bawk a ni. Tun tum Inthlanpui ah hian Mizoram pumah Polling Station te inbiakpawhna lamah hma sawn zelin Wireless network leh Mobile phone network in a cover vek tura ruahman a ni a, inbiakpawhna ah harsatna awmlo tur a hma lak a ni.
Mizoram Police ten kan hmalakna hrang hrang zingah Ruihtheihthil, zu, drugs leh adangte dan lova zuar leh kengte dap a man zel a ni a. Dt. 25.11.2018 thleng khan heng ruihhlo leh thilthalo kan mante hi Rs. 4,19,64,610/- man hu vel a ni tawh a ni. Tin, Non-bailable warrants te chak taka bawh zui a ni a, Mi awmtha duhlo leh Buaina siam chingte chungah hma lak zel a ni bawk. Tin, ECI in a duh ang in Licensed Arms-te endik a Police Station-ah te dah deuh vek tawh a ni bawk.
Ram pumah Mizoram hian Inthlanna muanawm tak leh felfai chhinchhiah tlak tak kan lo nei tawh thin a, hengte hi mipuiten dan kan zawm that thin vangte, NGO-te leh Kohhran hruaitute leh MPF te Sorkar Official-te nen a tha taka kan thawh ho vangte leh hma nasa taka an lak thin vangte a ni a. Hengte hi a chhuanawm in chhunzawm zel turin kan in ngen nawn leh a. Mizoram mipuite leh NGO,CYMA/YMA, MHIP, MUP, MZP, MSU te, Kohhran hruaitute leh MPF-te tawiawmna zarah boruak muanawm tak hnuaiah Inthlanpui felfai tak kan neih leh ngei pawh kan beisei tlat a ni. Tin, Kohhran hruaitute, MKHC zahawm tak te hmalakna leh MPF ten Political Party-te leh Candidate-te Election Model Code of Conduct tha taka zawm tura an hmalakna te a chhuanawm in a entawn tlak hle a ni. Hemi chungchangah hian Mizoram Police pawhin an hnathawhte kan thlawp tlat a ni.
Ralmuang tak leh boruak tha tak hnuaiah Mizoram Inthlanpui hi kan neih ngei theih nan Police Department chuan Mipuite, NGO hrang hrang te, Kohhran hruaitute leh Political Party zawng zawng te tha taka thawk tlang a, Mizoram Police te hnathawh min tawiawm zel turin kan ngen nawn leh a. Kumin a Mizoram Inthlanpui hi Ram chhunga Inthlanna thianghlim leh felfai ber ni turin hma ila theuh ang u.
