Tukin zingkar atang khan Lawngtlai District chhunga inthlannaa duty tur polling party nimin lama chhuak bak zawngin an duty-na tur polling station lam an pan leh a. Heti hian Lawngtlai District chhunga assembly constituency pathuma polling station 161-a duty tur polling party-te chuan an duty-na tur hmun theuh an pan kim ta.
Polling party kal chhuak turte hian Govt Lawngtlai College-ah an bungraw mamawh turte la khawmin, EVM & VVPAT ken turte an enfiah a. Chumi hnuah an duty-na tur polling station theuh panin an kal chhuak hlawm a. Polling party kal chhuak turte hi Returning Officer-te, nodal officer-te leh sector officer-te'n an lo buaipui a ni.
Polling
station 59 awmna 36-Tuichawng (ST) Assembly Constituency-a duty turte chuan
nimin khan an duty-na tur hmun an pan kim tawh a. Vawiina kal chhuakte hi
polling station 68 awmna 37-Lawngtlai West (ST) Assembly Constituency-a duty
tur nimina kal chhuak bak polling party 36 leh polling station 34 awmna
38-Lawngtlai East (ST) Assembly Constituency-a duty tur nimina kal chhuak bak
polling party 21, an zavaiin party 57 an ni. Vawiin hian Sector Officer la
chhuak bakte paw'n an sector lam an pan ve nghal bawk.
Lawngtlai District-a assembly constituency pathumah hian polling station 161 awmin, he'ng zingah hian hmeichhia chauh duty-na tur pink polling station pakhat theuh siam a ni a; chu'ngte chu - 36-Tuichawng-ah Saizawh West Polling Station, 37-Lawngtlai West-ah Chawnhu Polling Station leh 38-Lawngtlai East-ah Lawngtlai Electric Veng Polling Station te an ni.
