Vawiin khan Election Commission of India mi pawimawhte, tlawmngaipawl hrang hrang aiawhte leh sorkar thupuangtute nen I&PR Conference Hall-ah meeting an nei.

Election Commission of India aiawhte hi Director General PK Dash, Director General Akshay Rout, Director General Ashish Srivastav, Secretary SK Rudola, Secretary Sumit Mukherjee, Secretary NN Butolia te niin Mizoram Chief Electoral Officer Ashawani Kumar, Jt.Chief Electoral Officer Pu H.Lalengmawia leh mi pawimawh dang ten an tawiawm a ni. Kumina Mizoram Legislative Assembly inthlanpui lo awm turah inthlanna fel leh fai, dik leh muanawm a awm theihna tur te, vote nei zawng zawngin vote an thlak ngei theihna tura tan la turin tlawmngai pawl te leh thuthar lakhawmtute thawhho puiah an sawm a. Sorkar lam chuan inthlanna thianghlim a awm theih nan dan hmangin tan nasa takin la mahse a hlawhtlin tak takna tur erawh chuan mipui thinlung hneh a pawimawh tih sawiin CEO Pu Ashwani Kumar chuan tlawmngai pawl leh thuthar lakhawm tute hian dan leh thupek kengkawhtute tih theih bakah hna nasa takin an thawk thei a ni, a ti.

Meeting neih zawh hnu hian ECI mithiamte hian Mizoram District tina DC leh SP te bakah Election kaihhnawih officer te nen I&PR Conference Hall-ah vek training an neih pui chhunzawm a.Model Code of Conduct chungchang te, Strong Room leh vote chhiar chungchang te bakah inthlan chuh tum hming pe te endik dan leh thil pawimawh hrang hrang an zirho a ni.

Hetihlai hian Agriculture Conference Hall-ah Jt.CEO Pu H.Lalengmawia hovin District Level Master Trainers Training neih a ni bawk a. EVM hman dan te zirin mithiam ten District hrang hranga Master Trainers te tan training an buatsaih a ni.