May ni 11, 2013-a Laipuitlanga chhiatnaa tuar ve an thawhpui pahnih te puala tanpuina, Transport Department Officer leh Staff ten an ni khat hlawh an thawhkhawm chu Transport Minister Pu P.C.Zoram Sangliana’n vawiin tlai khan a hlan. Transport Department Joint Secretary Pu Lalrinawma, a in chhe vek hnenah leh Conductor Pu H.Lalsangzela, a fapa Lalthasanga chan ta te hnenah an thawh khawm tanpuina sum Rs 2,07,820 /- chu hlanin Minister chuan Transport Department-a thawktute inhmangaihna leh inpumkhatna chu ropui tiin vawng nung zel turin a fuih nghal a, tuarte intuarpuina chu ringtu te tih awm reng a ni tiin ram tana an thawhna ah rinawm leh thahnemngai taka thawk chhunzawm zel turin a chah bawk.

Director Pi Lalzarmawii kaihhruai tanpuina inhlanna inkhawm ah hian Transport Secretary Pu C.Lalhmachhuana pawhin thu sawiin Department-a an thawhpui tuarte tanpui nana an ni khat hlawh an thawh khawm thei chuan inhmangaihna, inpumkhatna leh thawhhona tha an neih a tarlang a ni, a ti a. Transport Department chu department pawimawh berte zinga mi, Sorkar tana sum (revenue) chhung lut thei department tlemte zinga mi a ni tiin an mawhphurhna pawimawh zia hriaa ram tana theihtawp chhuaha thawk zel turin a fuih bawk.