2576/2026-2027

Aizawl the 8th October, 2026: Nimin khan Samagra Shiksha leh Tharthilthlentu (Tili) te buatsaih intodelh inzirtirna Inter School Final 2026 chu Dawrpui Multipurpose hall-ah neih a ni a, School Education Commissioner & Secretary Pu K.Lalthawmmawia’n khuallian niin he hun hi a hmanpui.

Pu K.Lalthawmmawia chuan he hunah hian thu sawiin Intodelh inzirtirna final-a rawn tel zingah mipa aiin hmeichhia an tam zawk a, Electoral roll-ah mipa aiin hmeichhia an tam zawk bawk a; Kohhran pawl lian pahnih KTP leh TKP te Conference report-ah member thi zingah mipa thi chu zaa 80 bawr vel an ni a, an thih chhan hi zu leh ruihhlo kaihhnawih natna a tam hle tih sawiin Mizo hmeichhiate hian pasalah Mizo ngei neih duh mah se neih tur an awm lo thei mai dawn a, hei hi kan dinhmun a nih avangin kan hnam hian ral lam kan pan tihna a ni, a ti. Zirlaite chu ruihhlo laka inthiarfihlim tur leh puitlinna kawng zawha lehkha chhiar tam turin a fuih a. Zirlaite chu an zir chhuah hunah mi hnuaia thawk ni mai lovin ruaitu nih tum turin a chah a, sorkar hnathawk kan la ngaihsan reng chuan kan la changkang tawk lo tihna a ni, a ti bawk.

Commissioner & Secretary Pu K.Lalthawmmawia chuan he intodelh inzirtirna project hian zirlaite chu mahni kea din dan ngaihtuah thiamna te, nu leh pa hlutna te, sum thawh chhuah harsat zia te, nu leh paten an fate tana ngaihtuahna an hman dan leh fate mamawh tur an tuak dan hautakzia te a hriattir a; heng atang hian zirlaiten puitlinna kawng an zawh thei tur hi a hlu hle a ni, a ti bawk.

Nimina Intodelh Inzirtirna Inter School final-ah hian Govt.KM Higher Secondary School (Flashlight) te chu pakhatna an ni a. Trophy bakah Rs. 15,000, Medal leh Certificate an dawng a. Pahnihna Thenzawl Senior Secondary School (Second A)-in Rs. 10,000, Medal leh Certificate an dawng a, pathumna Govt. Saitual High School -(Sunshine) chuan Rs. 5,000, Medal leh Certificate an dawng a ni.

He intihsiakah hian Best Presenter-ah Lalchhanchhuahi – Govt.KM Higher Secondary School (Flashlight) chu thlan a ni a. Lawmmanah Rs. 1500, Memento leh Certificate pek a ni.

Consolation Prize Rs 1000 leh certificate chu heng school te hnenah hian pek a ni bawk:- Govt.Bethlehem Vengthlang HS (T&R), Thenzawl Senior Secondary School (Nihawi) , Govt. Central HSS (Educere), Govt. Saitual HSS (Awmthyt), Govt. Serchhip HSS (NOP ), Govt PCR HS (OT5) New Serchhip, Govt.JM HS (SnoopDog) Serchhip, Govt. Durtlang HS (Seeds of Success), Govt. Republic HS (AB7), Govt. Keifang HS (Zero).

Tun tum Intodelh inzirtirna Inter School final 2026 ah hian Samagra Shiksha State Project Director Pu C.Lalthanzira’n kalkhawmte lawmna thu a sawi a, School Education Minister Dr Vanlalthlana chu a hna tul avanga a tel theih loh avangin a thuchah Video message ngaihthlak a ni a. School Education Director Pi Angela Zothanpuii,  SCERT leh MBSE Officer te, Samagra Shiksha Officer te an tel bawk a. Tun tum intihsiakah hian Aizawl khawpui chhung bakah Saitual leh Serchhip District te huam tel an ni a,  intihsiaknaa tel zirlaite hi an zirlaipuite leh zirtirtuten an tawiawm  bawk a ni.