2577/2026-2027

Kolasib, 8th October, 2026: Vawiin khan DC Office Chamber, Kolasib-ah Kolasib Bawrhsap Pu H. Dolianbuaia kaihhruaiin TB Mukt Bharat Abhiyaan chungchang sawihoin thutkhawmna neih a ni.

Thutkhawm kaihruaitu Bawrhsap Pu H. Dolianbuaia chuan TB umbo a nih theih nana theih tawp chhuah a ngaih thu sawiin, mipuite hriselna atana he hmalakna pawimawh zia hi kalkhawmte hnenah a tarlang a. Vawiin thutkhawm hi sorkar laipuiin 'Joint Squad for Health' a tlangzarh denchhena neih a ni a. TB natna hi Health Department chauhvin an do hneh theih loh avangin, department hrang hrangte tangkawa beih a nih theih nan he Joint Squad hi din a nih thu tarlan a ni bawk.

He hunah hian Dr. R.K. Lalthlamuana, Chief Medical Officer (CMO) leh Dr. Ramdinthari Sailo, District TB Control Program ten thusawina hun an hmang a. District chhunga TB dinhmun leh umbo a nih theih nana hmalakna report ngaihthlak nghal a ni.

National Tuberculosis Elimination Programme (NTEP) in April atanga September 2026 chhunga report a tarlan danin, TB Notified CAT-I mi 74 leh CAT-IV mi 5 an awm a. TB leh HIV vei kawp mi 3 awmin, enkawl dam (Success Rate) hi 90.48% a ni a, mi 6 in he natna avang hian nunna an chan a ni. Nikshay Mitra hnuaiah inziaklut mi 8 awmin, tun dinhmunah active mi 13 an awm a. TB damlo, eitur (food basket) dawng thei mi 22 awmin, tun dinhmunah heng mi 22 te hian tanpuina hi an dawng mek a ni.

TB Mukt Bharat Abhiyaan (March 24 atanga May 22, 2026) kalpui chhung khan camp (shivir) vawi 37 buatsaih a ni a. Hemi chhung hian mi 5,600 te chu X-ray hmanga endik (screened) niin, rinhlelhawm (abnormal) mi 1,260 hmuh chhuah an ni a, an zinga mi 10 te hnenah TB natna hi hmuh chhuah a ni.

Hmasawnna tehfung (Indicator) hrang hrang tarlan a nih danin, kum 2015 khan TB avanga thi mi 38 an awm a, kum 2030-a tihhniam tum zat (target) chu mi 4 a ni. Kumin 2026 (January atanga June) chhungin mipui nuai 13.70 zinga mi 87 in TB avangin nunna an chan tih tarlan a ni bawk. TB vei thar hmuhchhuah (incidence) hi kum 2015 khan 2,145 a nih laiin, kum 2030 target chu 430 a ni a, kumin 2026 (Jan-Jun) chhung hian 1,101 hmuh chhuah a ni tawh bawk.