2578/2026-2027

Lunglei, 2026 Khuangchawi Thla ni 8: Vawiin khan Lunglei District chhunga zirlaite'n Artificial Intelligence (AI) an hmelhriat theihna tur leh a ṭangkai zawnga an hman thiam theih nana inzirtirna, "Lunglei Gen-AI Mission: Lunglei's Gen-Alpha, Empowered by AI" kalpui dan tur chungchangah a kaihhnawih official-te chu Lunglei District Bawrhsap Pi Navneet Mann hovin a hna thawh pindanah an ṭhu khawm.

He ṭhut khawmah hian Deputy Commissioner Office-a officer-te, DEO leh education official-te, DIPRO leh CodeYogi Foundation ai awhte an tel a. CodeYogi Foundation aṭangin Pu Rakesh Sehgal chuan Gen-AI Mission nihphung leh a ṭangkaina te, CodeYogi-in India ram hmun hrang hranga an kalpui tawh dan te sawiin, zirlaite'n chiang zawka AI an hmelhriat a, a ṭangkai zawnga an hman thiam theihna tur leh a nghawng ṭha lo awm thei laka an inven thiamna tura uluk tak leh hriat thiam awlsam taka zir tur ruahman a nih thu a sawi a. Zir tur chu a video-a siam a nih thu leh zirlaite'n anmahni remchan huna an lo en a, an zir mai theih tura ruahman a nih thu a sawi.

Bawrhsap Pi Navneet Mann chuan Lunglei District-a Gen-AI Mission kalpui tura ruahmanna siam a nih dan leh thil pawimawh hrang hrang a sawi fiah a. Gen-AI Mission kalpuina atana DEO Office-in sikul an thlan chhuahte thlir ho niin, zirtirtute orientation training kalpui dan tur te, a hawnna hun hman dan tur leh hlawhtling taka Gen-AI Mission kalpui a nih theih nana rawtna leh ṭul hrang hrangte sawi ho a ni bawk.

Lunglei District Bawrhsap bul tuma District Education Office leh CodeYogi Foundation te nen ṭang tlanga Gen-AI Mission kalpui turah hian AI chungchang leh tun laia AI platform chi hrang hrang leh a hman dan inhrilhfiahna te, ṭha zawk leh ṭangkai zawka AI hman theih dan inzirtirna te kalpui a ni dawn a. CodeYogi Foundation te'n zir tur video (module) 30, darkar 1 awh ṭheuh an siam chu a thlawnin zirlaite hnenah thawn niin, anni'n zirtirtute kaihhruaina hnuaiah an remchan danin an lo zir ṭhin dawn a ni.