2579/2026-2027

Aizawl the 8th October, 2026: Vawiin chawhnu 1:30 khan Pu Lalnghinglova Hmar, Sports Minister office-ah National Thermal Power Corporation (NTPC) leh Mizoram State Sports Council (MSSC) te chuan Lengpuia cheng nuai 1328.11man Archery Academy sak tura thawhhona thuthlung, Memorandum of Agreement an ziak. Archery Academy hi Mizoram Sorkarin Empowering Mizoram Sports a kalpui mek hnuaia hmalakna niin, Mizoram Sorkar sum seng lovin, NTPC Corporate Social Responsibility Fund hmanga sak tur a ni.

Sports Minister Pu Lalnghinglova Hmar chuan MoA sign chu thil lawmawm leh phurawm tak a ni tih sawiin, “Mizoram Sorkarin hmathlir neiin sports a kalpui a, Olympic Games 2036 ah infiammi a tam thei ang ber thawh kan duh. Chu hmathlir tihlawhtling tur chuan talent neih a ngai a, chung talent te chawikang turin infrastructure tha a ngai bawk. Kan hmathlir tihlawhtling tura kan beihnaah vawiina MoA kan ziah hian nasa takin min pui dawn a ni.” a ti.

Minister chuan pawisa hmuh chu a bultanna chauh a la ni tih a sawi a. “Pawisa kan hmuh chhan ang ngeiin, academy changtlung tak nei turin theihtawp kan chhuah tlan a ngai. Vawiinah hian Archery hmasawnna kan duh a, Mizoram in hma sawn se kan duh. Chumi piahlamah, a tawpkhawkah chuan sports-a India hmasawnnaah Mizoram tel ve se kan duh a, Vision 2036 Olympics hlawhtlinna’n tha thawh ve kan duh a ni. Mizoramin Olympian pahnih kan neih tawh zinga pakhat chu Archer a ni a, NTPC puihnain Archery-ah Olympian dang an rawn chhuah leh ngei ka beisei a ni” a ti. Archery Association of Mizoram chu a neitu rilru pu a, MSSC leh NTPC te vilpui tur leh thawhpui turin a sawm bawk.

Pu Amit Kumar Asthana, Additional General Manager & Head of HR, NTPC Bongaigaon pawhin MoA sign chu lawmawm a tih thu a sawi a. “Mizoram Sorkarin sports-ah hmathlir mumal tak a nei a, awmze nei taka hma a lak avangin keini pawh kan phur a. MoA pawh Mizoramah ngei ziah kan duh avangin kan lo zin a ni.” a ti a. Lengpuia Archery Academy sakna tur cheng vaibelchhe 13.28 chu North East-a sports CSR fund an pekchhuah tawhah a sang ber tih a sawi bawk.

Vawiina MoA ziahnaah hian Pu Henry C. Lalrawnkima, Secretary, Mizoram State Sports Council chuan report a pe a. Archery Academy sakna’n ram 38,864 square metre a awm thu leh, kum thum chhunga sak zawh tum a nih thu a sawi. Project-ah hian archery range bakah academic building, archery hostel, a entute tan gallery leh pavilion, a panna kawng, a hungna leh lighting, equipment leh gym te chu a hlawm lian zual a ni tih a tarlang a, shooting lane chu metre 70 a thui ruahman a nih thu a sawi. NTPC chungah lawmthu sawiin, Mizoram Sorkarin grassroots level-a coaching leh talent haichhuahna tur Empowering Mizoram Sports a kalpui mekah Archery chu sports discipline ngaihpawimawh zingah a tel tih a sawi bawk a ni.

He hunah hian Pu V. Lalzawmliana, President, Archery Association of Mizoram pawhin thu sawiin, “Olympian kan neih tawhna a nih avangin Mizoten archery-ah theihna kan nei tih a chiang a, chu theihna tihmasawn tura academy tha tak kan nei tur hi thil lawmawm tak a ni.” a ti.

Vawiina MSSC leh NTPC in MoA an ziahnaah hian Smriti Das, Executive CSR, NTPC Bongaigaon, MSSC officer te leh Archery Association of Mizoram hruaitute an tel a ni.

Project dinhmun tlangpui:

Project hming: Establishment of Archery Academy at Lengpui, Mamit District, Mizoram
Project cost: Rs. 1328.11 lakh
Project Funding Agency: National Thermal Power Corporation under Corporate Social Responsibility (CSR) Fund
Nodal Department: Sports & Youth Services Department
Implementing Department: Mizoram State Sports Council
Executing Agency: Mizoram State Sports Council
Duration: 36 months
Location: Lengpui, Mamit District, Mizoram