No.1172/2020-2020

Vawiin chawhma khan Pu K Lalrinliana, Minister of State for Food, Civil Supplies & Consumer Affairs department chuan Indian Oil Corporation Ltd. Corporate Social Responsibility sum atanga Ambulance an dawn chu District Hospital, Kolasib-a hman turin a hlan a. Dr H Lalthlangliana, Deputy Commissioner, Dr Lalhlimpuia, CMO, Dr Robert Lalfakzuala, DMS te leh District Hospital a thawktu engemaw zah hlanna hunah hian an tel a ni.

Minister Pu K Lalrinliana chuan District Hospital in a a mamawh em em, damlo phurhna tur Ambulance neih a nih theih nan February 2019 atang khan IOCL hotute nen indawrna neih tan a nih thu a sawi a, a tul ang angte DC Office, Kolasib kaltlang a buaipui a nih hnuah January 2020 khan tihfel niin, vawiin a District Hospital a hman theih tur a a awm ta chu a lawmawm hle a ni, a ti a. Minister chuan Kolasib district chu ramri thui tak awmna district a nih angin leh kan thenawm ramah Covid-19 hri kai hmuh belh mek a nih avangin, Covid-19 dona kawngah a hmatawng pawimawh tak an nih thu a sawi a, hemi kawng a thawktu Sawrkar leh khawtlang pawl hrang hrang atanga thawkchhuak thin te chungah lawmthu sawiin Sawrkarin zawm tur hrang hrang a duan te zawm a, fimkhur tak a thawk turin a chah bawk a ni. Pu K Lalrinliana chuan IOCL chu Mizoram tan Oil leh LPG a kan mamawh hrang hrang phuhruk nana kan dawr tam ber a nih thu a sawi a, CSR hmang a Kolasib District Hospital a hman tur Ambulance an ruahman sak lehzel avangin lawmthu a sawi bawk a ni.

Dr H Lalthlangliana, Deputy Commissioner chuan Ambulance chu Kolasib mipuite leh Covid-19 do nana hmanraw tangkai tak a nih tur thu a sawi a, Supply Minister hmalakna leh IOCL hotute inpeknaah lawmthu a sawi bawk.

He hun hi Dr HC Lalnunhlua, MO chuan kaihruaiin Pu Z Lhungdim, Chief Plant Manager, Mualkhang Bottling Plant chuan IOCL aiawh a thusawiin, IOCL chuan Mizoram tan a hna an thawk thei chu lawmawm a tih thu a sawi. Dr C Vanlalhlimpuia, MO chuan lawmthu sawina hun hmangin, bialtu MLA hmalakna avangin District Hospital a hman tur Laparoscope thar neih a nih thu te, Lithotripsy khawl chah mek a nih thu te leh ama mimal ruahmanna a nurse pahnih chhawr mek te avangin lawmthu a sawi bawk a ni.

Minister Pu K Lalrinliana hian Kolasib Project veng a Multipurpose stadium sak mek te, DCSO Office & Quarter, Godown leh Staff quarter sak laite a hmunah a enpui a. Mizofed LPG office, Khuangpuilam tlawhin thawktute nen LPG dinhmun te a sawipui a, TNT tlawh lehin an mamawh leina tur Cheng 20000 a hlan bawk a ni.