No.1171/2020-2020

Lawngtlai, Tomir thla ni 18, 2020: Vawiin khan Lawngtlai District Level Task Force on COVID-19 chu an Chairman Pi Shashanka Ala, IAS hovin DC Conference Hall-ah an thu khawm a. COVID-19 vanga inkharkhip thawh lina kalpui dan tur an sawi ho.

Chairman Pi Shashanka Ala chuan COVID-19 avanga inkharkhip thawh lina, May ni 18 atanga ni 31, 2020 chhunga kalpui chhunzawm dan tura state sawrkar atanga ruahmanna awmte a sawi fiah a. Hemi ruahmanna bawh zui dan tur leh a hlawhtlin theih nana hma lak dan tur hrang hrang te, COVID-19 laka him tura Lawngtlai District chhunga chet lak chhunzawm dan tha ber tur te ngaihtuah ho a ni.

Inkharkhip thawh linaah hian a hma aia inthlah dulna lai awm mah se, sawrkarin zawm tur dan a zamte chu khauh taka ken kawh a ni dawn a. He thut khawmah hian inkharkhip kalpui mek atanga thlak danglam awmte inhrilhfiah a ni.

Ram dang nena inrina (international border) leh state dang nena inrina (inter-state border) khar mekte chu khar chhunzawm zel tur a ni a. Sawrkar ruahmanna anga state pawna tangkhangte hruai kir mek chungchangah lo la haw belh turte chu a theih chin chinah District Headquarters (Lawngtlai)-a sawrkar enkawl inkhung hrannaah dah theih dan ngaihtuah tum niin, hemi atan hian kohhran hrang hrangte chu kohhran hall te hmantir tura ngen an ni a, quarantine facility nodal officer-te leh medical officer-te'n chuti anga hman theih tur chu hman tlak a nih leh nih loh an endik hnuah a tul anga hma lak zui a ni ang. Mutbu chungchangah sawrkar suma lei vek ngai lo tura pawl leh mimal thawh phal an awm chuan remtihsak ni se tih a ni a, Lawngtlai khawpui chhunga mi khung hran turte pawh a thei chu mahni mutbu intodelh tura tih ni se, tih a ni. Hetih lai hian district headquarters-ah quarantine vek theih a nih loh chuan CHC leh PHC awmnaah te tih theih dan ngaihtuah a ni ang.

Inkharkhip thawh lina kalpui chhung hian zirna in, biak in leh vantlang puipunna hmun hrang hrangte chu khar chhunzawm a la ni rih dawn a. Zirlaibu zawrhna, mihring leh ran damdawi zawrhna leh inentirna hmun tih loh District hmunpuia dawr dang reng reng chu a ni kar thlaka inhawn kalpui chhunzawm tur niin, District hmunpui ber ni lo khaw dangah erawh dawr hi dan pangngaia inhawn phal a ni a. Damdawi dawr tih loh dawr dang reng reng chu tlai dar 5 thleng bak hawn phal a ni lo thung.

Pawn chhuak tur reng rengin tha taka hmui tuam zel tur a ni a. Aizawl Municipal Area chhung tih loh hmun dangah chuan lirthei an registration number azira intlan chhawk a ngai tawh lo va. Khualzin phur lirtheite leh khaw chhunga veivak phur lirtheite pawh an phurh theih zat pangngai phurh phalsak an ni tawh bawk a. Chutih rual chuan hmui tuamna hman leh hand sanitizer hman that te, lirthei tihthianghlim that te erawh a ngai thung.

DLTF chuan inkharkhip thlah dul a nih avang hian COVID-19 hi a hlauhawm ta lo tihna a nih loh avangin mipuite chu fimkhur reng tur leh tul bik tak tak lovah chuan pawn chhuah tum lui lo turin a ngen a. Kum 65 chin chung lam te, taksa hriselna lama harsatna nei sa te, nau pai te leh naupang kum 10 hnuai lam te chu mahni inchhunga inkharkhip tha leh zual tura chah an ni.

Inkharkhip thawh lina kalpui chhung hian khawlaia mihring inhnaih chilh loh (social distancing) chu zawm zel tur niin, mi panga aia tam hmun khata awm khawm phal a ni lo va. Zan dar 7 atanga zing dar 4 inkarah COVID-19 kaihhnawiha duty leh DC-in phalna a pek ni lo tu mah khawlai chhuah phal a ni lo bawk.