Vawiin khan Information & Public Relations Department leh Mizo Photographers’ Society (MPS) tang kawp chuan 180th World Photography Day pualin I&PR Auditorium-ah hun an hmang a, he hun hi MPS President Pu Tlauliana chuan kaihruaiin, I & PR Secretary Pu Sangdingliana, IAS chu khuallian a ni.

I&PR Director Pi Lallianpuii chuan kalkhawmte lo lawmin, I&PR Department leh MPS ten   World Photography Day puala hun an hmang thei chu lawmawm a ti a, ni chhinchiah tlak a ni, a ti a. Thalak hmanga Mizoram mawina leh ram dang aia a danglam bikna te, khawvel hriata phochhuah hi I&PR Department leh MPS te tum ber a ni, tiin a sawi a. Chanchinbu chhuak tam takah thlalak tha tak tak tihchhuah a ni thin a, hengte hian mipui rilru a khawihin, a hlu em em a ni, tiin a sawi a ni.

Khuallian Pu Sangdingliana chuan Photography chu mihring hlimthla phochhuak thei hmanrua leh tangkai tak a ni, a ti a. I&PR Department chu Mizoram Allocation of Business Rules, 2019 hnuaiah June thla atangin Nodal Department a ni a, Photography hmasawnnan MPS chu State pum huapa khaikhawmtu leh district danga mite nena thawkho tur an ni, a ti a. Department chuan hmalakna a ngaihtuah ang a, budget te pawh a hrana dah a ni, tiin a sawi a. Photography avang hian hmun changkang, mawi leh mawi lo te, chhiatna, lawmna hrang hrangte hmuh theih a ni a, khawvela thil siamchhuah leh ropui ber zinga mi a ni, tiin a sawi bawk a ni.

World Photography Day pual hian Photography Workshop neiin Pu Pratab Chhetri MIS,  Pu Johny Ngurthansanga, Asst. Secretary, MPS leh Pu Runremmawia Tochhawng, MPS ten paper present na hun an nei a. MPS ten August Ni 3 atanga Ni 11 chhhunga MPS Facebook Group ah World Photography Day puala intihsiak an buatsaih lawmman semna hun an nei bawk a, he intinsiakna ah hian Category 10 awmin, thlalak 1480 chhuang thehluh a ni a, thlalak te hi endiktu pathum Pu H.Lalchhankima, Pu K.Lalhmangaiha leh Pu Jacob Lalrinawma ten an en dik a ni. Lawmman hi category tina ti tha ber ten Rs 1000 leh citation an dawng a ni. Pu Malsawmtluanga, Director, Mizoram School of Photography chu Mizo te tan Photography sulsutu te zinga  ami leh National Leadership Awardee a nih avangin, chawimawina hlan ani bawk a ni.

Lawmman dawngte leh Category leh chu

Hming: Zothankhuma (Ainea)

Category: Abstract

Hming: Patrick Dawnglura

Category: Aerial

Hming: Dennis Lalmawia

Category: Architectural Photography

Hming: Zothankhuma (Ainea)

Category: Candid

Hming: J.Laltanpuia

Category: Landscape

Hming: C.Vanlalruata

Category: Mobile

Hming: F.Lalramsanga

Category: Portrait

Hming: Raymond B. Malsawmtluanga

Category: Table Top

Hming: Vanlalpeka Sailo

Category:  Street

Hming: R.Thangkima

Category: Wildlife

World Photography Day hi M izoram-ah vawi sarih hmanna a ni a, Intihsiakna Category Architectural Photography hi a vawikhatna a ni.

Attachment

  • Loading attachment...