Vawiin khan Information & Public Relations Department leh Central YMA tangkawp buatsaihin Central YMA Hall, Tuikhuahtlangah YMA Chanchinbu enkawltute pualin chanchinbu enkawl dan zirhona “Media Workshop, 2020” neih a ni a. He hun hi Deputy Chief Minister Pu Tawnluia’n khuallian niin a hmanpui a, I&PR Director Pi Lallianpuii chu khualzahawm a ni.

Vawiin hun hmanpuitu Pu Tawnluia chuan YMA chu thalaite a nawlpuia kan fuankhawmna, kan khawtlang leh hnam nun timawitu a ni a ti a. YMA thiltumte chu a zahawmin kan hnam leh khawtlang nun innghahna lungphum pawimawh tak a ni a ti. Pu Tawnluia chuan YMA branch hrang hrang atanga YMA chanchinbu enkawltu kalkhawmte chu fakawm a tih thu sawiin hlawh pawh nei lova, hun leh tha seng a khawtlang hmasawnna atana tlawmngaih chhuahtu an ni tiin an hnathawh chu ropui a tih thu a sawi. YMA chanchinbu chu khawtual mipuiin an chhiar leh bengkhawn, mipui beng ti var tu a ni a, tunlai khawvelah eizawnna a dang tawh a, hunawl kan neih tlem tawh lai hun a thenawm khawvengte inkara palai hna thawk a, inpawhna tha siam sak tu a ni tiin chanchinbu a thuchhuah tur chungchangah fimkhur a tul thu leh thubelhchiandawllo chhuah lo tura fimkhur turina chah a ni.

Khualzahawm Pi Lallianpuii pawhin YMA chanchinbu enkawltute chu an pawimawhzia inhre thar leh fo tura chahin, chanchinbumite tih tur leh tih loh tur chi hrang hrang a awm tih sawiin working journalist ang ni chiahlo mahse heng inkaihhruaina hrang hrang zingah hian an zawm tur leh zawmloh tur hrethiam se a duh thu a sawi. I&PR Director chuan YMA chanchinbu kaltlangin khawtlang mipui sukthlek a thlak danglam theih a ni tiin, sik leh sa, nungcha humhalh bakah khawtlang min run tu sualna chi hrang hrang laka fihlim tura inzirtirnate tarlang tam thin se a duh thu a sawi a, hun inher danglamin a herchhuah pui thil chi hrang hrangte ngaipawimawh a hriatchian zung zung a pawimawh hle a ni a ti a, social media hman fimkhur inzirtir a pawimawh thu pawh sawilangin YMA chanchinbu enkawltute chu rilru puitling pu tur a chah in thudik ngainat a pawimawh thu leh grammar uluk a pawimawh thu a sawi bawk a ni.

Central YMA hian I&PR Department nen a tangdunin kum 1999 atang khan Media Workshop hi an buatsaih tan a, Vawi 15 Media Workshop hi buatsaih tawhin I&PR Department nen tangdun hian vawi 13 an buatsaihna a ni. Vawiin Media Workshop ah hian Aizawl khawchhung YMA Branch 83 leh Aizawl khawpui pawn YMA Branch 58 atangin YMA chanchinbu editorial board member thahnem tak an tel a ni.

Media Worshop hi hun hnih a then niin thawhkhatna ah Pu Romawia Pachuau, Editor, YMA Chanchinbu paper buatsaih “YMA Chanchinbu enkawl dan” tih chu zirho a ni a, thawhhnihna ah Pu Lalmuanpuia Khiangte leh Pu Lalnunfela Hlawndo te paper buatsaih “Chanchinbu kalphung bihchianna” tih chu zirho a ni.