Vawiin hian PB Lalzuithanga Filling Station Serchhip a dah tur Petrol chu a that tawk loh avangin thawn let leh a ni.

Ni 1.2.2020 (Inrinni) a MZ- 06 5527 hmanga rawn phurh thlen Petrol tha chi (Xtra Premium) litres 12,000 chu chu an lo tih thin tawh angin Pu Johny Zonunmawia, Legal Metrology Inspector hova endik a ni a. Delivery Challan-a a density rawn inziak 759.9 chu rawn pha tawh lovin, 763.7 density chauh a ni tih hmuh chhuah a ni a, Motor Spirit and High Speed Diesel (regulation of supply & distribution & prevention of malpractices) Order, 2005 dan ang chuan +/- 3 a pelh hi a thiang lo a ni. He Petrol ah hian Khawnvartui pawlh ngei ni a hriat niin, Quality Control Order in a sawi angin motor khalhtu Lalrinpuia, Chhiahtlang leh a motor chu man nghal a ni a. Essential Commodities Act in a sawi angin a Driver leh motor hi Deputy Commissioner, Serchhip hnenah ni 3.2.2020 khan hlan a ni ta a ni.

Addl DC, Serchhip thupek angin Petrol sample te hi ni 4.2.2020 ah Addl. DC office chamber ah endik nawn leh vek a ni a, Tank Lorry chamber tin te oil phurh hian dan in a phut an rawn tlin zo lo vek tih hmuhchhuah nawn leh a ni a, hetiang a nih avang hian ni 4.2.2020 vek khan he Tanker hi Load an lakna hmun Silchar ah thawn let leh a ni ta a ni.