Vawiin chawhnu khan Pu David L. Thangliana, Director, Information & Public Relations Department chuan Serchhipa Press Club sak mek chu a hmunah kalin a tlawh a, he hun remchangah hian Serchhip District MJA ten amah thlahna hun an lo buatsaih nghal bawk.

Director hian Serchhip MJA ten Press Club tur an sak mek chu an thawk tha tawk hle a a hriat thu a sawi a, sum leh pai an mamawh belh turte pawh ziaka rawn thlen leh turin a hrilh a, a tul angin thuneitu sang zawk hnenah thlen sak dan departmentin a lo ngaihtuah leh dawn nia, tiin MJA hruaitute a chah a ni.

Vawiin tlai vek hian Serchhip MJA te hian I&PR Conference Hall ah Pu David L. Thangliana hi Super Annuation Pension a thla tawpa a chuah tawh dawn avangin thlahna hun an buatsaih nghala. Ngaihhruina thilpek hlanin zanriah an kilpui nghal bawk a ni.