Vawiin chawhnu khan DRDA Conference Hall, Lungleiah Lok Sabha inthlan zawhfel tak chungchang sawiho turin Lunglei DC Pi K. Lalrinzuali leh media mi te an inkawm. He inkawmhona ah hian Lunglei SP Pu C. Lalthanmawia, PD Pu K. Lalrohlua, Addl DC Pu Benjamin Lalzama leh official dangte, MJA President Pu H. Lalthansanga leh member te an tel tha hle.

Lunglei DC Pi K.Lalrinzuali chuan Lunglei District-ah Lok Sabha Election 2019 harsatna lian tham awm lova tluang taka zawhfel a ni chu lawmawm tiin sawrkar hnathawkte, media mi te, political party aiawhte, NGO leh khawtlang hruaitute, kohhran hrang hrang leh Lunglei District mipuite chungah lawmthu a sawi a. Mizoram puma vote tla chu 63.12% niin Lunglei District ah vote tla sang berin 64.98% a tlak thu a sawi a. Lunglei District hnuaia EVM 191 te chhiar theihloh a chhia engmah a awmloh thu sawiin vote tla te tluang taka chhiar zawh a nih thu a tarlang. Lunglei DC chuan media mi kalkhawmte hnenah lawmthu sawiin Election kaihhnawih thuthar thehdarhna kawngah fim tak leh thlei bik neilo a thu an chhuah thin chu lawmawm a tih thu a sawi a ni.

Lunglei SP Pu C. Lalthanmawia pawhin thu sawiin Election hun chhungin dan leh thupek kenkawh kawngah Police ten harsatna an neih loh thu a sawi a. Inthlan vuakveta police duty tura ruat mi 430 leh BSF platoon khat ten tluang taka an duty an hlen chhuah thu a sawi. Inthlan vuakvetah sila hmanga intihthaih leh invau a awmloh thu sawiin Lunglei District a Active License nei  te zingah za zela 82.06 ten an silai an tun thu a tarlang bawk.

Lunglei District ah nimin (23rd May 2019) khan vote chhiar tluang taka zawhfel niin election chhung hian Polling personnel 920, Counting Staff 231, ARO 7, Nodal Officer hrang hrang 10 leh District Level Master Trainer 4 te ngawrh takin an duty a ni.