Pachhunga University College, Mizo Department leh Art & Culture Department, Govt. of Mizoram tangkawpin an buatsaih ‘Certificate Course in Mizo Cultural Studies and Performing Arts’ zirchhuak mi 20 te hnena Certificate hlanna inkhawm chu Champhai North bialtu MLA, Dr. Z.R.Thiamsanga chuan a hmanpui.

PUC leh Art & Culture Department hian kum 2017 atang khan an college zirlaite tan he certificate course hi an kalpui a, tun tuma zirchhuak te hi batch hnihna an ni. Hen zirlaite hnena certificate semna inkhawm hi Course Asst. Director Enid H.Lalrammuani chuan a kaihruai a, Course Coordinator, Dr.Zoramdinthara’n course kalpui dan sawiin, Course Director, Dr. Tawnenga leh Art & Culture Dy. Director, Lalchuailova ten thu an sawi a, Course Asst. Coordinator, H.Laldinmawia’n lawmthu sawiin hun hnung a khar.

Certificate semnaa khuallian, Dr. Z.R. Thiamsanga chuan, Mizo culture leh kan sakhua hi kan suihzawm thiam a pawimawh a, inhne rem taka kan kalpui a pawimawh hle a ni,’ a ti a. Englai pawhin, eng hunah pawh Mizo culture chu zahpui loh tur a nih thu leh culture ngaihhlut chu hnam dinchhuahna atana thil pawimawh tak a nih thu sawiin, “Kan hnam lam, kan culture hi kan ngaihhlut chuan kan hnam a ding chhuak dawn a ni,’ a ti. PU College leh Art & Culture Department-in cultural studies course an kalpui chu sorkar beng thleng thama kalpui zel pawimawh a tih thu a sawi bawk.

Course Director, Dr. Tawnenga chuan college-a principal a nih chhunga thil tih tura a ruahman, Adopted Village, Finishing School leh Cultural Studies te a taka kalpui vek a nih tawh thu sawiin, “Mizo te hian keimahni tawng, kan culture, kan hnam lam leh kan thu leh hla hmang ngei hian kan fate kan awih tlei chhoh zel a tul a ni,” a ti bawk.

He cultural studies course-ah hian PU College Mizo Department faculty ten theory class lain, Mizo culture te, Mizo hnam lam pawimawhnate an zirtir a. Art & Culture Department-in hnam lam an zirtir thung a ni.

Attachment

  • Loading attachment...