Vawiin ni 8.5.19 hian Department of Information & Public Relations in Ailawng Film City atana a lo puan tawh a hmalakna hrang hrang te chu Pu Lalruatkima, I&PR Minister hovin Official Visit neih a ni a. Ailawng khuaah hian Village Council leh YMA bakah khawtlang hotuten lo hmuak in VC House ah hun tawite hman a ni.

He hun hi Pi Lallianpuii. MIS, Jt. Director, I&PR Department chuan kaihruaiin Ailawng khua Sawrkar in Film City atana a lo puan tawh dan leh hmalaknate a sawi a. Pu Lalruatkima, I&PR Minister chuan “ Hetianga Sawrkar in ram tana rotling ngei tur a buatsaih theihna atana Ailawng khawtlang inphalnaah hian lawmthu a sawi a. He film city project hian hnam ala chawimawi ang a, thalai tam tak tan eizawnna ala siam dawn a ni,’ tiin hemi atana Department leh an thawhpui Mizoram Film Forum chungah pawh lawmthu a sawi a ni.

He inkhawm tawiteah hian Pu Sangdingliana, IAS, Secretary, I&PR Dept, Pu Lalthlamuana, VCP, Ailawng leh Pu Lalawmpuia Khiangte, Chairman, Mizoram Film Forum te pawhin thu an sawi a ni.

Hemi hnu hian hmalakna hrang hrang te chu tlawhin Theater cheibawl mek te leh management office hmun tur te, leh Film City chhunga Typical Village sakna tur hmunhma leh hmalak mek te chu fankual a ni a. Hnathawh kal mekte a hmuhin Pu Lalruatkima chuan lawmawm a ti hle a ni.

Ailawng hi film city atana buatsaih anih theihna tur hian khaw lu lamah ram zau tak pek a ni a, a khaw pumpui hi Film shooting nana hman theih tur niin, Mizoram Sawrkar, I&PR Dept chuan kum 2018 khan Ailawng hi Film City atan a lo puang tawh a, tunah hian inremna neih anih angin Monitoring Committee hnuaiah Ailawng VC chuan Implementing Agency niin hna hi an thawk tan mek a ni.

Ailawng Film City tlawh zawh hian Minister hian RD Department Minister anih angin Reiek BDO Office tlawhin, BDO leh staff te nen inkawmhona hun tha tak an nei bawk a ni.