Vawiin chawhma dar 11 khan Mizo Zirlai Pawl(MZP) General Headquarters chuan HSLC 2019 Result chhuak taa Top  10-a tlingte chawimawina Aizawl-a Vanapa Hall-ah an buatsaih a. He hun hi  School Education Minister Pu Lalchhandama Ralte chuan  a hmanpui a ni.        

School Education Minister Pu Lalchhandama Ralte chuan zirlaite fuihna thu sawiin kawng hrang hrangah Mizo naupangte tanlak a ngaih thu a sawi a. Hun rei loteah Chief Secretary atan Mizo an awm lo mai tur pawh zirlai ten veina chang an hriat a ngai a, Sawrkar hna pawimawh zual  Bawrhsap leh a dangah te Mizo kan awm mang tawh lova hei hi Mizo te tan thil him lo tak a ni thei a ni a ti. Zirlaite chu ram mamawh chhanna nih tum an intih hmuh angai a. Chutiang ni thei tur chuan kan ngaihsan zawngte, kan duhzawngte pawh hi kan thlak  a ngai tawh  a ni a ti

"Thalaite zingah All India service leh central service lama luh tum kan nei tlem sawt hle a, ram hmasawnna anih dan tur anga a kal chak theih nan chuan a post pawimawh zawng zawng hi ram leilung faten kan chelh hi duhthusam a ni", a ti. Hetih rual hian mawhphurhna sang tak chelhtu chu zirtirtute an tih tih a sawi a. Minister chuan, "Sorkarin Govt. School enkawl nan hlawh bakah building leh an mamawh chi hrang hrang a pe a, an rah chhuah atangin tun tumah pawh HSLC  top ten-ah Sawrkar sikul atangin tumah an lang lo chu thawktuten chonaah ngai se a a tha hle ang. Kum 2020 hmain sorkar school atangin top ten lang thei zirlai an awm ve ngei kan beisei a ni", a ti a. Tin, Sorkar school leh RMSA School-a HSLC pass awm lo Nil school te chu sorkarin a en zui dawn tih a sawi bawk a ni.

Zirtirtu indaih lo phuhruk nan MR teacher 946 a lak tur chu advertisement kaltlangin qualified trained chauh ten an hnawhkhat ang a ti a. School leh office ah IV grade indaih lohna phuhruk nan IV grade 54 lak tur phalna neih a ni thu leh  advertisement pawh chhuah a nih tawh thu a sawi a. MPSC result tihchhuah tawhah Primary School teacher 100, Middle School teacher 60 appointment pek mai tur an awm thu a tarlang bawk a ni.

HSLC Top 10-a tlingte chawimawina hunah hian MZP President  L.Ramdinliana Renthlei leh main sponsor Pu John Lalpeka te hnen atang pawhin thusawi ngaihthlak a ni  a.  MZP-in HSLC top ten-a tling an chawimawite hi mi 20 an ni a, hengte zirlai ti thate hnenah hian chawimawina thuziak, MZP chanchinbu leh pawisa faite hlan an  ni a. Topper hnenah Pawisa fai Rs 10,000/- hlan a ni a, a bak zawng chu Rs 5,000/- theuh  pek a ni.